Shillong, Nailar 03
Ka Langsning FC ka la pynjemkhnap ïa ka Mumbay FC da 5-0 kol na ka bynta ban khur ïa ka jingjop kaba nyngkong ha ka Group-E jong ka 135th IndianOil Durand Cup, ha ka lah sngi U Blei ha Jawaharlal Nehru Stadium, Polo.
Kane ka la wan lyngba u Syed Ahmed uba la thep ar kol, kumjuh u Kyrmenskhem Mukhim, Samuel Phawa bad u Dibormi Chanlang Ki O Kassar na ka bynta ban pynlong ïa kane ka kynhun hapoh ka jingïalam u Bah Khlaiñ Pyrkhat Syiemlieh ban khur ïa ki lai poiñ.
Watla ki paidbah ka nongbah ki la khmih lynti ban sakhi ïa u khlur akphlim Bollywood u Tiger Shroff ba un ïalehkai na ka bynta ka Mumbay ha kane ka jingïakhun, hynrei kaba phylla ka long ba um shym la don hapoh ka thup kyrteng jong ki rangïalehkai.
Dangshen ha ka taïew ba la lah, utei u tyngshop bad uba long ruh u trai jong ka Mumbay u la wan lang bad katei ka kynhun sha kane ka nongbah na ka bynta ban pynkhreh ïa kane ka lympung.
Kumba ka paw ha kane ka jingïalehkai kaba nyngkong, baroh ar ki kynhun ki la pyrshang ban ïalehkai bha naduh kaba sdang. Watla ki la ïoh ïa ki katto katne ki kabu kiba biang, hynrei kim shym la lah ban thep kol haduh kaba kut jong ka kylla step.
Dei hadien katto katne por ba la bteng ïa ka kylla miet ba ka Langsning ka la ïoh ban thep ar kol lyngba u Syed Ahmed ha ka minit kaba 51 & 65. Hapdeng kane ka jingïakhun, ka Langsning ka la ïoh ban thep biang ïa ka kol kaba lai lyngba u Kyrmenskhem Mukhim (89) na ka bynta ban tam 3-0 kol.
Kumba ka paw ki rangïalehkai ka Mumbay ki la sdang ban duh mynsiem ha ka rukom ïalehkai bad dei hangne ba ki rangïalehkai ka Langsning ki la thom naphang ha kaba ka la ïoh ban thep biang sa ar kol hashwa ban kut artad ka jingïalehkai lyngba u Dibormi Chanlam (90+4) bad u Samuel Phawa (90+6) na ka bynta ban khur syndon ïa ka jingjop.
Kumba ka paw dei tang ka Shillong Lajong bad ka Langsning kiba dangkhur jingjop ha ki ar tylli ki jingïalehkai. Ha ka jingïalehkai kaba nyngkong, ka Lajong ka la jop ïa ka Nongkseh S&CC da 2-0 kol.
Te Kumta ka Langsning kan ïakynduh pyrshah ïa ka Nongkseh ha ka 6 tarik (sngi Palei). Katba ka Shillong Lajong pyrshah ïa ka Mumbay ha ka 8 tarik. Kine ki jingïalehkai kin long ha ka por 7 baje janmiet.
