Nongpoh, Nailar 03
Hadien bun snem jong ka jingap khmih lynti bad angnud ki samla ïalehkai, ka Ri Bhoi District mynta ka kynti ka la ïoh syndon ïa ka madan ïalehkai phutbol ba la siang da u phlang plastik ne Artificial Turf kaba paka ïa kaba la tei ha Umbuda, marjan bad ka sor Nongpoh.
Ïa kane ka madan ïalehkai la wan ban plie paidbah da u Myntri ka tnad C&RD, GAD bad SAD ka Sorkar Jylla u Bah Sosthenes Sohtun kum u kongsan ha ka jingdon ryngkat u Bah Mayralborn Syiem, MLA ka Nongpoh kum u symbud kongsan.
Ha kane ka sngi, la sakhi ruh ïa ka jingdon ryngkat u Bah Damanbait Lamare, MLA ka Umroi, u Bah Banteidor Lyng-doh, MLA ka Mawkynrew, Bah Synshar Kupar Roy Lyngdoh Thabah, MLA ka Sohïong, u Bah Balajied Kupar Synrem, MLA ka Shella, Bah Kyrmen Shylla, MLA ka Khliehriat, u Bah Pius Marweiñ MLA ka Ranikor, ka Kong Rona Khymdeit, MDC ka Nongpoh, u Dr. Abhishek Saini, Deputy Commissioner ka Ri Bhoi, u Giri Prasad Superin-tendent of Police ka Ri Bhoi, Bah Hamletson Dohling, President ka Meghalaya Football Association (MFA) nalor kiwei kiwei de ki heh ophisar ka Jylla, ki nongïalam shnong, ki riew paidbah bad ki khynnah skul.
Kumban shu kdew hangne, ïa kane ka madan ïalehkai la tei lyngba ka jingbei tyngka jong ka State Plan Scheme ka Sorkar Jylla ha ka jinglut kaba T. 10.93 klur. La pyntreikam pat ïa kane ka skhim hapoh ka jingpeit jingkhmih jongka State Sports Council ka Megha -laya (SSCM).
Ka jinglah ban plie paidbah noh ïa kane ka madan ïalehkai hadien ar snem ba la buh mawnongrin ïa ka, kata ha ka 5 tarik u Lber 2024 da u Myntri Rangbah ka Jylla u Conrad K Sangma, ka long ka jingkyrkhu kaba khraw ïa ki khun samla ka thaiñ ba kin ïoh ïa ka rynsan kaba ïaryngkat dor bad ka juk kaba mynta na ka bynta ba kin hikai pyntbit ïa la ki sap ki phong ha ka jingïalehkai phutbol jong ki.
Ha kane ka sngi, la pynshongshit shuh shuh ïa ka prokram lyngba ka jingïalehkai phutbol paralok hapdeng ka MLA XI pyrshah ïa ka Officer XI, ha kaba la sakhi ba jan baroh ki MLA kiba la wan poi ha kane ka prokram ki la shim bynta shitrhem ban ïakhun pyrshah ïa ki ophisar ka Ri Bhoi.
Haba ai jingkren ha kane ka sngi, u Bah Sosthenes u la ai ka jingkhublei kaba kyrpang ïa u Myntri Rangbah ka Jylla, u Conrad K Sangma halor ka jingurlong kane ka projek ha ka district. U la ïathuh ruh ba ki dangdon shibun kiwei kiwei de ki projek kiba kane ka sorkar ka la lah dep ban tei na ka bynta ban ailad ïa ki khun samla ba kin ïoh ban sei ïa ki sap ki phong jongki ha ki liang bapher bapher.
U la pynpaw ruh ïa ka jingsngewkmen ïa ka Mawroh-Umbuda Management Committee kiba la trei shitrhem ban pynïaid beit ïa ka jingtei ïa kane ka projek ha ryngkat ki bor pynïaid district, ka tnad ïalehkai bad kiwei kiwei de ki tnad treikam sorkar tad haduh ba la lah ban pyndep bad plie paidbah ïa ka.
U la ong ruh ba kane madan ka long kum ka jingdon jingem kaba ai jingmyntoi ïa ki khun samla ka Ri Bhoi kiba la sdang ban paw ha kiba bun ki kam ïalehkai, khamtam eh ka kam ïalehkai phutbol, kaba u la ong ba ka long kum ka jingim ha ka jylla. Te kumta u la kyntu ruh ïa ki khun samla ba kin shim kabu ban pyndonkam hok ïa kane ka madan na ka bynta ka jingmyntoi ka jong ki.
Ha kawei pat ka liang u Bah Sohtun u la pynpaw ïa ka jingdonkam ban don ïa ka shlem ai jinghikai kaba kyrpang (academy) na ka bynta ki khynnah naduh ba ki dangrit karta ban sei ïa ki rang bad ki ‘thei ïalehkai, kiba lah ban mihkhmat ïa ka ri hi baroh kawei ha ki kyrdan bapher bapher shabar jongka ri ruh kumjuh.
Ha kane ka sngi la ïoh ka jingkren na u Bah Mayralborn lem bad u Dr Abhishek, kiba la pynpaw ka jingïaroh ïa ka Sorkar kaba la shimkhia ban pynurlong ïa kine ki projek kiba long ka jingmyntoi shikatdei ïa ki nongïalehkai ka thaiñ, khamtam ki khun samla ym tang ba kin lait na ki jingshah pynngop ha ki jingdih pynbuaid kum u drok, hynrei ba kin ïoh ruh ïa ka lawei kaba phyrnai.
