Shillong, Nailar 03
Ka kylla ïalehkai kaba ar ne ka second round jong ka lympung ïalehkai Shillong Premier League 2026 kan bteng mynta ka sngi Ba-ar, ha kaba ki artylli ki kynhun kata ka Rangdajied United FC bad ka Sawmer SC kin ïa mih madan ban ïakhun tyngeh ban ïoh ïa ki lai point.
Kane ka jingïakhun kan long ha ka por 4 baje nohphai sngi ha SSA Stadium kaba ha First Ground, Polo.
Haba kyrtiang dien ha ka kylla ïakhun ba nyngkong, ka Sawmer SC tnoit ka la mad ïa ka jingshah rem da 1-0 kol hakhmat ka lahduh ka samoi ïalehkai ba la dep, ka Langsning FC, katba ka ka Rangdajied United FC hapdeng ka jingïakhun kaba tyngeh ka la lah ba kan ïakhaid da mar 1-1 kol bad ka MLP F.T.
Kum ka kynhun ka Rangdajied ka dei ka klob ba la lah ban wan ba-ar kumba hynñiew sien ha kane ka lympung bad ban rah teng shisien ïa ka nam lahduh ha ka samoi ïalehkai 2013.
Ha kane ka samoi ïalehkai kaba mynta, kum ka klob ka la pyrshang ban pynkhlaiñ ïa la ka kynhun ha kaba u Dameki Khongstia u dei u khynnah ïalehkai ba kynsai bad ba tbit tam, kam pher ba ha ka jingïakhun kaba la dep, u la hap ban leit phai noh sha ka jaka shong, ïa kaba la suba ba imat u la shitom, ïa kaba la bynrap lang sa ka jingdon u Henryford Nongneng uba la wan na Shillong Lajong FC, kaba la ïarap ban kham pynskhem bha shadien ïa kane ka kynhun.
Haba phai sha ka Sawmer SC, na ka jingïakhun kaba la dep ka wat ba nyngkong ka la lah shisha ba kan sei ïa ka buit ïalehkai ba kynsai ka jong ka, kaba don ruh ki khep ba i kumba kan khyrwit syndet syndet ïa ka Langsning lyngba ki ‘counter attack’.
Kum ka kynhun, ka Sawmer SC ka don ruh ïa ki kato katne ki rangïalehkai ba thymmai ba ka la pynrung kum u Raikutshisha Buam bad u Banteilang Lyngdoh, bad ha kane ka jingïakhun ka shi kol ba ki la shah thep ha ka Langsning FC ka dei tad haduh ka minit kaba 81.
Kumta mynta ka sngi la sngewthuh shai ba kum ka kynhun kan hap ban ïakhun tyngeh na ka bynta ban khur ïa ka jingjop bad ruh ïa ki lai point ba pura, ne wat ki khynnah ka Rangdajied ruh kin pyrshang ban leh ïa kaei kaba ki donkam.
