Khliehriat, Nailar 03
Ka Maya Club Umkiang ka la pynliem noh ïa ka Kuliang YWSC da 5-0 kol na ka bynta ban khur jingjop ha ka lympung ïalehkai 3rd Division Football Tournament ba la pynïaid da ka East Jaiñtia Hills District Football Association bad u Kermiki Pala u la khur ïa ka hat-trick, ha ka lah sngi U Blei ha madan Diengshynrum, Khliehriat.
Ha kae ka jingïakhun ki rangïalehkai ka Maya Club ki la lah ban pynpaw ïa ka jingtbit ha ka rukom ïalehkai ha kaba u Kermiki u la ïoh ban thep ha ka minit kaba 1, 10, 73 & 80, katba ïa kawei pat la thep da u Suna kassar (40+1) na ka bynta ban khur syndon ïa ka jingjop.
Ha ka jingïalehkai kaba ar, ka Cham Cham SCSC ka la jop da 3-0 kol ïa ka Shymplong SCSC. Ïa kine la thep da u Roymon Phawa ha ka minit kaba 10, kumjuh u Wanme Phawa (18) bad u Viklies Phawa (80+1).
Haba phai sha kawei pat ka jingïalehkai, ka Nongkhlieh SC Huroi ka la pynliem ïa ka Moopala SCSC da 2-1.
Ha kane ka jingïakhun ka Moopala ka la pynkhih jar nyngkong lyngba u Enguh Syrti ha ka minit kaba 11. Hynrei ka Nongkhlein ka la lah ban pynphai kylla ar kol lyngba u la thep da u Lawan Pynkmen Khongmalah ha ka minit kaba 26 bad u Wanlamborlang Lamin (55).
