Shillong, Nailar 03
Ki nongïalam ka Umrynjah Sports Club ha ka jingplie ïa ka lympung ïalehkai phutbol myn ha ka sngi Saitjaiñ hapoh shnong Umrynjah, ki la ainam bad ïaroh ïa u Bah P.T Sawkmie, ba watla um long MLA shuh hynrei ki ïohi ïa ka jingthrang jong u ban kyntiew ïa ki samla ha ka liang ka phutbol bad kiwei kiwei de ki jait jingïalehkai.
Kine ki nongïalam kiba la pynpaw ïa kane ki long u President ka Umrynjah SC, u Bah E. J Umdor bad u Secretary, Bah L. Kharshiing.
Na ka liang u MLA barim u Bah Sawkmie ruh u la pyrto bad ïaroh ïa ka Umrynjah SC, wat hapdeng bun ki jingeh ka danglah ban pynlong manla u snem ïa ki lympung ïalehkai jong ka.
U pynpaw ruh sha ki nongïalehkai, la ka dei ha kam ïalehkai phutbol ne kiwei ki jait jingïalehkai, ki nongïalehkai ki donkam ban pynshitom ban kiew shaphrang.
Ha katei ka sngi la ïoh ruh ïa ka jingkren na u Rangbah Shnong ka Umrynjah u Bah J. S. Nongdhar ha ka jingdon ryngkat ka Kong Pynhun Rynjah, kawei na ki nongbei tyngka ïa ka Rynjah United SC bad kiwei kiwei.
Ha ka jingïalehkai plie pyrda ïa katei ka lympung, ka Rynjah United SC ka la pynliem ïa ka Umden Mission A da 2-1 kol.
Baroh ki kynhun kiba ïashim bynta ha kane ka lympung ïalehkai phutbol ba la pynïaid da ka Umrynjah SC ki don 32 tylli na kylleng ki thaiñ ka Mawlai bad Ri-Bhoi.
