Guwahati, Nailar:
Ki pulit ha Assam bad Manipur ki la pynshitom da kaba tyngeh ïa ki kynhun khaïi drok ha ka thaiñ Shatei-Mihngi, da kaba kem ïa hynriew ngut ki nongkhaïi drok bad ïoh kurup ïa ki dawai methamphetamine tablet, heroin bad brown sugar kiba la khein lang kumba T.23 klur tyngka ha ki jingpyntreikam ba kyrpang.
Ki pulit ka Assam, ki la ïoh ban kurup hashwa kane ïa ka jingkit kaba heh jong ki jingdih pynbuaid, ba kynthup ïa 50,000 tylli ki dawai Yaba bad u drok Heroin, na kawei ka kali ha Amingaon bad ki la kem ïa lai ngut ki briew na Manipur, ong ki heh pulit ha ka 1tarik Nailar.
Da kaba pynsted ïa ka jingpyntreikam hadien ba la ïoh jingtip kaba kyrpang, ki bor jong ka aiñ ki la bat ïa kawei ka kali Tata Nexon kaba don ïa u nombar AS 11-AA-6800 ha Amingaon kaba hap hapoh jong ka Kamrup distrik.
Ïa kane ka jingkhynra la ïalam da u Kalyan Kumar Pathak uba dei u Additional Superintendent of Police (Headquarter), Kamrup.
Kine ki briew kiba la shahkem ki dei kiba la tip kyrteng kum u Kh Tabish (24) jong ka Thoubal distrik, Thekcham Avinash Singh (41), uba na Thoubal, bad u Nongmaithem Biswajit (38) jong ka Imphal West district.
Ha ka jingtalasi bniah ïa kane ka kali, ki pulit ki la ïoh kurup ïa 50,000 tylli ki dawai Yaba kiba don ïa u drok Methamphetamine, kiba khia kumba 5 kg khlem da song, ïa kiba la kynnoh ba la buhrieh hapoh ki jaka ba rieh ba la shna kyrpang.
Ki pulit ki la ïoh ban kurup ruh ïa san tylli ki synduk sabon kiba don ïa u drok heroin, uba khia kumba 67.5 gram khlem da song.
Ïa ki dawai pynbuaid ba la ïoh kurup la antad ba ka dor jong ki ka long kumba T.12.5 klur, katba ïa ka jingkheiñ dor jong ka kynhun CID ïa ki jingdih pynbuaid la buh kumba T.7.5 klur, la ïathuh ki heh sorkar.
La sdang ïa ki kam katkum ka aiñ kiba donkam pyrshah ïa ki lai ngut kiba shah kynnoh, bad ka jingtohkit ka dang ïaid shakhmat ban tip ïa ka tynrai bad ka jaka ba la thmu ban phah ïa u drok.
Ïa kane ka jingïoh kurup la ïohi kum ka jingjop kaba khraw ïa ki pulit ka Assam ha ka jingpynkhreh kaba dang ïaid shakhmat halor ka jingkhaïi drok bad ka jingpyrshang ban khanglad ïa ka jingwan rung ki drok sha ki distrik jong ka Lower Assam.
Ha ka jingkhynra kaba kyrpang ha Manipur Jiribam district, ki pulit ki la bat ïa kawei ka kali ha ka por ba ki leit ban talasi man ka por ha ka jaka talasi ba man ka sngi ha Leingangpokpi bad ki la ïoh ban kem ïa u Bhima Panika (42 snem) uba shong basah ha Karbi Anglong district jong ka Assam.
Ka jingtalasi ïa kane ka kali ka la pynlong ban lap ïa u brown sugar ba khia 5.21 kg, kaba la antad ba ka shongdor palat 10 klur tyngka ha ka ïew beaiñ.
Ki pulit ka Manipur ki la kem ruh ïa kawei ka longkmie kaba 27 snem ka rta kaba la tip kyrteng kum ka Shahna kaba na Kwakta ha Bishnupur district hadien ba ki la talasi ïa ka jaka sah jong ka.
Ki ophisar ki la kurup kumba 70 gram u drok heroin ba la buhrieh ha ki ar tylli ki sop sabon, ha kaba u drok ba la kurup u shongdor palat 55 lak tyngka.
Ha kawei pat ka khubor kaba ïadei bad ka mukotduma NDPS kaba kham hashwa, ki pulit ki la kem ïa u Meraimayum Razak Ahamed (35) na Imphal East district.
U dei u nongshah kynnoh ba kongsan ha ka mukotduma kaba ïadei bad ka jinglap ïa u brown sugar na kawei ka Pajero SUV kaba la lap ha kawei ka jaka shna kali kaba hap hapoh ka jingpeit jong ki pulit ka Patsoi Police Station.
Ki pulit ki la ïathuh ba ka jingtohkit ka dang ïaid shakhmat ban lap ïa kiwei pat ki dkhot jong ka kynhun khaïi drok bad ban wad ïa ka tynrai bad ka jingpynpoi ïa ki drok ba la ïoh kurup.
