Shillong, Nailar 05
Ka kynhun ki nongïalehkai karate hapoh ka lama jong ka All Meghalaya Karate-Do Association (AMKA) ka la khur haduh 88 tylli ki takma ha ka Indian Challenger Cup 2026, kaba la poi sha kaba kut ha Netaji Indoor Stadium, Kolkata.
Kine ki kynthup ïa 41 tylli ki takma ksiar, kumjuh 21 ki takma rupa lem, bad 26 tylli ki takma rnong.
Ha katei ka lympung kaba la sdang naduh 31 tarik u Naitung haduh 2 tarik u Nailar, la ïalam ïa ka kynhun kaba duh 73 ngut da ki coach kiba kynthup ïa u Bah Donboklang Lyngdoh, Mingson Rymbai, Greater E.M. Kharpuri bad u Bah Pynhunlang Kharbuli.
Halor kane ka jingwanrah nam bad burom ïa ka Jylla, na ka liang ka AMKA ka la ai khublei ïa kitei ki nongjop bad kumjuh ïa baroh ki nongshim bynta kiba la mihkhmat ïa ka Jylla ryngkat ka jingtrei shitom bad ka jingangnud ba kin nangkiew shaphrang ha ka kam ïalehkai ka jong ki.
Napdeng kitei kiba la khur takma, hynriew ngut kiba la khur haduh lai tylli ki takma. Kine ki long u Jason Mcryan Malngiang, uba la khur 3 tylli ki takma ksiar ha ka kumite, individual kata bad ha ka team kata. Katba Dakitdorbha L Chyne, Elisheba Khongwar, Gideon Tympuiñ, Rebeka Nongspung bad u Savio Bakynsai Majaw, ki la khur ar tylli ki takma ksiar bad mar kawei ka takma rupa.
