Khliehriat, Nailar 05
Ka Youth SC Pyrtakuna, Teilang SCSC Lummyrli, bad ka Moonongtdu SC ki la khur jingjop ha ka 3rd Division Football Tournament ba la pynïaid da ka East Jaiñtia Hills District Football Association (EJHDFA) ha ka sngi Balang ha madan artificial turf Diengshynrum.
Ha ka jingïalehkai kaba nyngkong, ka Youth SC Pyrtakuna ka la pynliem noh ïa ka Tuber Shohshrieh da 1-0 kol bad ïa kane la thep da u Financial Sumer (55).
Ha ka jingïalehkai kaba bud ka Teilang SCSC Lummyrli ka la jop da 2-0 kol ïa ka Tpepswer TSSWO. Ïa kine ki kol la thep da u Jona Rymbai (18) bad u Winson Bamon (77).
Haba phai sha kawei pat ka jingïalehkai kaba khatduh, ka Moonongtdu SC ka la pynliem ïa ka Umtyra YWSC da 3-1 kol. Ka Umtyra ka la pynkhih jar nyngkong eh lyngba u Kitlang Lapasam (20). Hynrei ka Moonongtdu ka la lah ban pynphai kylla ar kol lyngba u Etilas Lyngdoh ha ka minit kaba 65 bad u Shanti Lyngdoh (66) hashwa ba u Poimi Nongtdu (80+5) un thep ïa ka kol kaba khatduh na ka bynta ban khur syndon ïa ka jingjop.
