Shillong, Nailar 05
Ka State Elite Men’s Boxing Championship ka la sdang ha ka sngi Balang ha Williamnagar, East Garo Hills ha kaba la wan shim bynta da ki nongïakura na ki 9 tylli ki district bad 5 tylli ki klob jong kane ka Jylla.
Ïa kane ka rynsan ïakura kaba lai sngi la plie da u Deputy Commissioner ka East Garo Hills District u R.P Marak (IAS) ha kaba la ïadon lang Additional Deputy Commissioner u Ashish Koch bad u District Sports Officer (DSO) u Mongera Marak, ki dkhot nongkitkam ka Meghalaya Boxing Association, ki coach, ki nongïalehkai bad kiwei.
Watla kane ka rynsan ïakura ka long tang na ka bynta ki shynrang, hynrei la kynthup lang ruh ïa ar tylli ki kyrdan ïalehkai jong ki kynthei.
Ki la don haduh 34 tylli ki ’bouts’ kiba la lah ban pynlong ha kane ka sngi sdang ryngkat ki wat jingïakhun pre-quarter bad ka quarter ha la ki jong ki kyrdan. Te kumta kane ka rynsan ïakura ka ban kut ha ka 7 tarik la khmih lynti ba kan long kaba itynnad bad ka ban sei ïa ki nongïakura kiba kynsai bad ki ban mihkhmat ïa ka Jylla ha ki rynsan ïakura ki ban long ha kylleng jong ka ri.
