Shillong, Nailar 06
Ka Langsning FC ka la lah pynïakhaid kylla ha ka kylla miet pyrshah ïa ka Nongkseh SS&CC da 2-2 kol na ka bynta ban bat ïa ka kyrdan ba hakhlieh ha ka Group-E jong ka 135th Durand Cup, ha ka sngi Palei ha JN Stadium, Polo.
Kane ka la wan urlong lyngba u Mebanshngaiñ Kurkalang bad u Syed Ahmed na ka bynta ban pynlong ïa ka LFC ban kamai 4 poiñ na ki ar sien ïakhun bad ban tam shi poiñ ïa ka Shillong Lajong FC (3 poiñ), kaba la don ha ka kyrdan ba-ar.
Ka jingbym lah ka Nongkseh ban khur ïa ki lai poiñ ka la long ka jingduh jingkyrmen ba kan jam sha kawei pat ka wat jingïakhun jong ka quarter final. Kane ka kynhun ka dangsah sa kawei ka jingïakhun pyrshah ïa ka Mumbay FC ka ban long ha ka 11 tarik.
Te kumta ka Shillong Lajong ka donkam ban kan jop pyrshah ïa ka Mumbay FC ha ka sngi Saitjaiñ (8 tarik) hashwa ba kan ïatynjuh bor bad ka Langsning ha ka 13 tarik, na ka bynta ban ïaknieh rung na katei ka group jong ka quarter final.
Haba phai sha kane ka jingïakhun, baroh ar tylli ki kynhun ki la ïakhun tyngeh naduh kaba sdang ha kaba ki la ïoh ïa katto katne ki kabu ksiar.
Ha kaba nyngkong ka Langsning kam shym la lah ban pynurlong ïa ki kabu ksiar, hynrei ka Nongkseh ka la ïoh ban pynkhih jar nyngkong eh lyngba u Shano Tariang ha ka minit kaba 29. Kane ka shi kol ka la nangpynïoh mynsiem ïa kane ka kynhun bad tang hadien shiteng kynta ka la thep biang ïa ka kol kaba ar lyngba u Hardy Cliff Nongbri (38) na ka bynta ban tam 2 kol haduh kaba kut jong ka kylla step.
Hynrei ka Langsning ka la wanphai da ka jingkhlaiñ bor ha ka kylla miet ha kaba ka ïoh ban pynphai kylla ar kol tang hapoh san minit. Kane ka la wan lyngba u Mebanshngaiñ (48) bad u Ahmed (50) na ka bynta ban ïakhaid mar 2-2 kol.
Hadien katto katne por kine ki kynhun ki la bteng ban ïakhun tyngeh ha kaba ka Nongkseh ka la ïoh ïa ki kabu kiba biang, hynrei ka la shah khanglad noh ha ki rangïalehkai ‘dien ka Langsning bad haduh kaba kut kine ki kynhun ki la kut ha ka jingïakhaid.
Ha ka sngi Thohdieng kane ka lympung kan long ha Ranchi hapdeng ka SC Delhi pyrshah ïa ka Defen-ders FC (Group-C) ha ka por 4 baje nohphai sngi, katba ka East Bengal FC ïa ka South United FC (Group A) ha ka por 7 baje janmiet ha Kolkata.
