Shillong, Nailar 06
Ka All India Football Federation (AIFF) ka lah ban pynmih da ka kynhun ‘second-string’ lane ka lah ban weng noh shi syndon na ka FIFA ASEAN Cup namar ka la buh hakhmat shwa na ka bynta ka jingïalehkai hapdeng ka India pyrshah ïa ka Brazil ka ban long ha Kolkata.
Kine ki ar tylli ki jingïalehkai ki la ïatakhuh lang, ha kaba ïa ka FIFA ASEAN Cup la thmu ban sdang naduh 24 tarik u Nailur haduh 4 tarik u Risaw. Katba ka jingïalehkai paralok hapdeng ka India pyrshah ïa ka Brazil la buh ban long ha ka 3 tarik u Risaw ha Salt Lake Stadium.
Ha ka jingïalang jong ka Executive Committee kaba la long ha ka sngi Palei, u kapten barim ka kynhun ïalehkai ka ri u Bhaichung Bhutia u la kyntu ïa ka AIFF ba kan buh hakhmat eh ïa ka FIFA ASEAN Cup.
“Nga la ai jingmut ba ngin buh hakhmat eh ïa ka FIFA ASEAN Cup namar ka jingkordor jong ka jingïakhun. Ki don ki kynhun kiba don ha ki kyrdan kiba kham shakhmat bad ïa ka India ha kane ka lympung, kynthup ïa ka Indonesia, Malaysia, Singapore bad Vietnam. Nalor kata, ki don ki bai ïashim bynta bad ka jinglah ban ïoh ïa ka khusnam pisa lada ngi ïashim bynta lynter,” la bynrap u Bhutia.
“Ka long kaba donkam ruh ban buh ha ka jingmut ba ka jingïalehkai paralok hapdeng ka India bad ka Brazil kan pynlut ïa ka pisa jong ka AIFF ïa kaba kam don. Wat lada ka don tang khyndiat ka jingsiew, kaba hadien lah ban ïoh biang lyngba kawei pat ka kynhun kaba lai, hynrei ka dangdon hapdeng ka jingeh kaba khraw,” u la bynrap.
Ka India, kaba don ha ka kyrdan ba 138 ha ka pyrthei, ka la shah kynthup lang ryngkat ka Indonesia, Malaysia bad ka Singapore ha ka FIFA ASEAN Cup, ha kaba dei tang kawei ka kynhun ka ban wan ha ka kyrdan ba hakhlieh ban jam sha kawei pat ka wat jingïakhun.
