Guwahati, Nailar:
U Myntri Rangbah ka Sikkim, u Prem Singh Tamang, ha ka 4 tarik, Nailar, u la pynbna ïa ki ar tylli ki khusnam thymmai hapoh ka jingthmu jong ka Aama Samman ban ithuh ïa ki jingnoh synñiang jong ki longkmie ha kylleng ka jylla hashwa ka Aama Samman Diwas kaba ar, ka ban sa rakhe ha ka rukom kaba heh bha ha madan ïalehkai Rangpo.
Ïa kane ka jingpynbna la pynbna ha ka Coordination Meeting ha Samman Bhawan ban bishar bniah ïa ki jingpynkhreh na ka bynta kane ka prokram, ka ban ïahap bad ka 9th Jan Unmukti Diwas.
Ïa ka jaka la pynkynriah sha ka madan ïalehkai Rangpo khnang ban lah ban pynlong ïa ka jingïalang kaba kham heh bad ban ai ka jaka kaba kham heh na ka bynta ka jingrakhe.
Napdeng ki jingpynkup burom ba thymmai, ka Aama Samman Puraskar kan ithuh ïa kawei ka kmie kaba dei hok na kawei pa kawei ka Assembly konstitwensi da ka khusnam pisa kaba T.51,000. Ïa kane ka khusnam yn ai kyrpang na ka bynta ki longkmie ki bym dei ki nongïoh jingmyntoi na ka Aama Sashaktikaran Yojana.
Ka sorkar ka la wanrah ruh ïa ka Pragatisheel Aama Puraskar, ka ban pynkup burom ïa ki lai ngut ki longkmie kiba la pyndonkam da ka nuksa ïa ki jingïarap pisa kiba la ïoh lyngba ka Aama Sashaktikaran Yojana. Ki nongjop kin ïoh ïa ka song pisa kaba 5 lak, 3 lak bad 2 lak.
Haba pynïaid ïa kane ka jingïalang, u Tamang u la kyntu ïa ki Myntri, ki nongthaw aiñ, ki nongïalam ka seng bad ki ophisar ba kin ïatreilang ha ka jingïatreilang ban pynthikna ba kan long kaba jop ban pynïaid ïa kane ka prokram ba pawnam. U la ban jur ba ka jingjied ïa ki nongïoh jingmyntoi bad ki nongïoh khusnam dei ban ïaid beit da kaba hok, kaba khuid bad kaba khlem shah shilliang.
Haba batai ïa kane ka jingthmu kum ka jingburom ïa ki longkmie, u Myntri Rangbah ka jylla u la ong ba kane ka prokram ka pynpaw ïa ka jingsngewnguh jong ka jylla ïa ka jingïeid ba khlem lenlade, ka jingaiti bad ki jingnoh synñiang ba shilynter ka jingim jong ki longkmie sha ka ïing ka sem bad ka imlang sahlang.
