Mawkyrwat, Nailar 06
Ka Mawkyrwat District Sports Association (MDSA) ha ryngkat ka jingïatreilang bad ka ophis jong ka District Sports Officer (DSO) South West Khasi Hills District ha ka sngi Palei ka la sdang ïa ka lympung 2nd bad 3rd Division Football League 2026-27 ha madan MDSA, Nonglang.
Ha kane kajuh ka sngi ka MDSA ha ryngkat ka jingïatreilang bad ka ophis u District Social Welfare Officer ka la ïoh ruh ban sdang ïa ka jinglehkai 4th Division jong ki khynnah kiba hapoh 18 snem ka rta halor ka phang “Play For Glory Say No To Drug”
Ha ka jingïalehkai jong ka 2nd Division, ka Mawjai ka la pynliem noh ïa ka Rangmaw da 2-1 kol.
Katba ha ka jinglehkai jong ka 3rd Division, ka Mawmerang ka la ïasam mar shi poiñ bad ka Phlang Kynshi hadien ba kim shym la lah ban thep kol haduh kaba kut ka jingïalehkai, kumjuh ka Banangroi ka la ïakhaid mar 2-2 kol bad ka Brothers United.
Haba phai sha ka jingïalehkai jong ka 4th Division, ka Nongdiat ka la khur ïa ka jingjop hadien ba ka la lah ban pynliem noh ïa ka Phottdei da 2-0 kol.
Ïa kane ka lympung la wan ban plie da ka Deputy Commissioner ka South West Khasi Hills District, Kong A.L Mawlong ha ryngkat ka jingdonlang ka DSO Kong Dairy Marweiñ bad E. Tariang, District Social Welfare Officer, ki nongkitkam ka MDSA bad kiwei.
