Imphal, Nailar:
Ki pulit jong ka Manipur ki la kem ïa lai ngut ki lehnoh kiba kynthup ïa uwei u dkhot ba trei shitom jong ka kynhun kaba la shah ñiew beaiñ ha ka sorkar ka ka RPF/PLA bad ïa 2 ngut ki dkhot jong ka kynhun NSCN (IM) kiba la donkti ha ka jingdawa pisa, ha kaba ki la ïoh ruh ban kurup ïa shibun ka kyiad ba la khaïi beaiñ.
Kumba la ïathuh ki pulit, la ong ba u dkhot jong ka kynhun RPF/PLA u dei uba la tip kyrteng kum u Thokchom Sanju Meitei ba la tip ruh da ka kyrteng kum u Luwang (26), uba dei u nongshong shnong jong ka Langmeidong Mamang Leikai kaba don ha Kakching distrik, une u la shahkem na Thangmeiband Khuyathong Polem Leikai kaba don ha Imphal West ha ka 4 tarik, Nailar. La ïoh ban kurup ar tylli ki bom kawang kti na u. Ki pulit ki la ïathuh ba une u la shah kynnoh donkti ha ka ban shna bom kawang kti ha ka thaiñ Imphal.
Ki pulit ka jylla Manipur ki la kem ïa arngut ki briew kiba la shah kynnoh ba ki la dawa pisa na ki nongleit nongwan ha Sibilong harud ka surok Imphal-Silchar National Highway (NH)-37 ha Tamenglong distrik, ong ki heh sorkar ha ka sngi Balang.
Kine ki briew kiba la shah kem ki dei kiba la tip kyrteng kum u Gaisuaklung Ngaomei (45) na ka shnong Bhalok bad u Job Gangmei (29) na ka shnong Sibilong Part-II ha Tousem sub-division, baroh arngut ki dei kiba don ha Tamenglong distrik.
Ki pulit ki la ïathuh ba ki la kurup ïa kawei ka Live cartridge, ka pisa kaba T.22 hajar, bad ar tylli ki kor ïakren Baofeng kiba don ki charger na kitei ki arngut.
Kine ki jingkem ki la jia katto katne sngi hadien ka jingïalang ba hakhliehduh ba la pynïaid da u Myntri Rangbah ka jylla u Yumnam Khemchand Singh ha Chief Minister’s Secretariat ha ka 1tarik, Nailar, ha kaba ka sorkar jylla bad ki seng kit mar ki la ïasoi ïa ka soskular MoU ban pynkhlaiñ ïa ka jingpahara ïa ki shipai ha shilynter ka surok bah NH-37.
Hapoh kane ka jingïateh, ka komiti pyntreikam kan pynkylla ïa ka rukom treikam kaba la don lypa hapoh shibnai, kan thung ïa ki Nodal ophisar bad kan sdang ïa ki jingpyntreikam jong ki pulit ha ka kyrdan jong ki distrik ban tehlakam ïa ka jingdawa pisa ha ki surok bah.
Ka NSCN (IM) ka la ïakren ïasuk bad ka sorkar pdeng naduh u snem 1997 hapoh ka jingïapynsangeh thma kaba thmu ban pynsuk ïa ka jingïakren saiñ hima sima. Ki kyndon ba kongsan ki khang ban shah byrngem, ban leit hiar thma bad ban pyni paidbah ïa ki shipai kiba phong da ki uniform ne kiba don tiar ïaleh.
