Shillong, Nailar 07
Ka lawei phutbol ha India tyngshaiñ bha ha kaba ka AIFF ka la pynbna ïa ka jingjied na bynta ka lympung FIFA U-15 World Cup ka bansa sdang shen, ha kaba la jied ïa u Bibiano Fernandes kum u head coach bad ïa u Ranjit Bajaj kum u manager ka kynhun lehkai ka Ri, kiban mih madan ha u bnai Risaw ha ka jingïakhun kaban long ha Azerbaijan.
Ka jingpynkhreh ka India na bynta kane lympung FIFA U-15 World Cup la ïaid shaphrang hadien ba ka AIFF ka la pynbna ïa ka jingjied ïa u Bibiano Fernandes bad ïa u Ranjit Bajaj uba long u nongseng ka Minerva Academy.
Ïa kane ka rai la rai da ka Executive Committee ka AIFF katkum ka jingai jingmut jong ka Technical Committee, ryngkat bad ka jingthung ïa u Fernandes katkum ka jingpdiang sngewbha jong u.
Baroh 211 tylli ki seng dkhot jong ka FIFA, kynthup ïa ka India, ki la ïoh ïa ka jingrung beit ban ïashim bynta ha kane ka jingïalehkai ba nyngkong eh ka ban ïalehkai ha ka rukom ïalehkai 8vs8 ha ki madan kiba kham rit, kiba la shna kyrpang bad 20 minit ha kawei pa kawei ka kyllastep/kyllamiet. Kawei pa kawei ka ri ka lah ban pynrung kyrteng 14 ngut ki nongïalehkai, kiba lah ban kynthup haduh arngut ki nongap kol.
Ha kajuh ka por, ka jingtyrwa jong ka Competition Committee ban pynthymmai ïa ka rukom ïalehkai kaba lai kyrdan na ka bynta ka Santosh Trophy bad ka Rajmata Jijabai Trophy kam shym la mynjur satia da ka Executive Committee, da kaba kdew ba ka don ka jingsngewkhia halor ki lad ïakhun bad ka jingpynroi ïa ki nongïalehkai.
“La kyrpad ïa ki Competitions Committee ban peit biang ïa ka rukom ba la tyrwa bad ban aiti ïa ka jingtyrwa ba la pynkylla thymmai ban bishar bniah da ka Komiti Pyntreikam ban pyntreikam ha ki aiom ban wan.”
Ka Executive Committee ka la mynjur ruh ïa ka mang tyngka jong ka AIFF na ka bynta u snem 2026-27. Ka la bthah ruh ïa ki seng jong ki Jylla kiba ka ‘Elekshon’ jong ki ka dei ban long ha une u snem ba mynta ba kin pdiang ïa ka National Sports Governance Act, 2025, bad ki Rules ba la shna hapoh jong ka ym kham shuwa ïa ka 20 tarik u Risaw.
