Guwahati, Nailar:
U Myntri ba dei khmih ha ka tnat Food, Public Distribution and Consumer Affairs jong ka Assam, u Kaushik Rai, ha ryngkat ka jingsynranlang jong u MLA ka Doomdooma, u Rupesh Gowala, u la leit jngoh ïa ka Material Recovery Facility (MRF) bad ïa ka jaka pynmih jaboh sha ka sboh (waste-to-compost) kaba don ha Ushanmati ha Ward No. 1 jong ka Doomdooma.
Ka jingleit jurip ka la pynleit jingmut ha kaba bishar bniah ïa ka jingtreikam jong ka jingthmu pynkhuid jaboh da ka jingstad saïan, kaba thmu ban kyntiew ïa ka jingpyndonkam biang ïa ki jaboh, ka jingpynmih sboh, bad ka jingpynkhuid ïa ki sawdong sawkun jong ki sor. Ha kane ka jingleit jurip la don lang ruh u Prasanta Phukan, MLA.
“Kane ka jaka ka long ka nuksa kumno ka jingpyndonkam ïa ki jaboh da ka saïan ka lah ban pynkylla ïa ki imlang sahlang. Da kaba pynkylla ïa ki jaboh sha ka sboh bad pynthikna ïa ka jingpynmih biang ïa ki tiar kiba lah ban pyndonkam biang, ngi shim ïa ka sienjam kaba don jingmut sha ka Doomdooma kaba khuid bad kaba koit ba khiah. Kum kine ki jingthmu kin ai jingmyntoi shibun ïa ki pateng ban wan.”
Katkum ka jingpynbna ba la pynmih hadien ka jingjurip, u Myntri u la ong ba ka jaka ka la thaw ïa ka rukom pynkylla ïa ki jaboh jabaiñ jong ki sor sha ka sboh dawai katba dang pynduna ïa ka jingjaboh ha ka thaiñ.
Ka jingthmu ka long ban pynkhlaiñ ïa ki rukom pynïaid ïa ki jaboh kiba lah ban neh bad ban noh synñiang sha ka jingïada ïa ka mariang lyngba ka jingpynïakhlad, jingpynkylla dur biang, bad pynlong sboh ïa ki jaboh ha ka rukom kaba biang.
Katkum ka kyrwoh, ka sorkar ka ngeit ba ka jingpynïar ïa kum kine ki jingthmu kan don ka bynta kaba kongsan ban tei ïa ka mariang kaba khuid bad kaba koit ba khiah ha baroh kawei ka Assam.
“Hapoh ka jingïalam jong u Myntri Rangbah ka Jylla u Himanta Biswa Sarma, ka sorkar Assam ka shimkhia ban pynkhlaiñ ïa ka jingpynïaid ïa ki jaboh jabaiñ katkum ka jingstad saïan ha kylleng ka jylla. Kumba ka long mynta, la khmih lynti ba kane ka jingpyntreikam kan ïarap ha ka ban pynkhuid ïa ka mariang bad ki sawdong sawkun ban wanrah ïa ka jingkhuid ha ki jaka sor bad kumjuh ban kyntiew ïa ka rukom im jong ki nongshong shnong,” la bynrap shuh shuh u Gowala.
