Shillong, Nailar 07
Ka Stephen Memorial Higher Secondary kaba na Mawlai Kynton Massar ka la ïoh rah ïa ka nam lahduh ha ka lympung ïalehkai kaba la tip kum ka 1st Mawlai Inter School Athletics Meet 2026.
Lah ban kdew ba kane ka lympung ïalehkai ka dei kaba la pynlong da ka Mawlai Games & Literary Association bad ka la sdang naduh ka 23 tarik u Naitung bad la pynhap pyrda noh hynnin ka 7 tarik u Nailar 2026 da u MLA ka Mawlai u Bah Brightstarwell Marbaniang kum u kongsan ha ka jingdonlang u District Sports Officer ka EKHD u Bah Damang Syngkon kum u kongsan kyrpang lem bad ki principal, ki nonghikai, ki kmie ki kpa jong ki khynnah skul lem bad kiwei kiwei ki nongshah khot sngewbha.
Ka Stephen Memorial Higher Secondary School kaba long ka lahduh ha kane ka lympung ka la ïoh khur haduh 37 tylli ki takma kiba kynthup ïa 17 tylli ki takma ksiar, 14 tylli ki takma rupa bad 6 tylli ki takma rnong.
Ïa ka kyrdan ba ar la ïoh da ka Umrynjah Presbyterian Higher Secondary School kaba la khur 28 tylli ki takma kiba kynthup ïa 11 tylli ki takma ksiar 7 tylli ki takma rupa bad 10 tylli ki takma rnong bad kyrdan kaba lai la ïoh da ka MayQueen Secondary School kaba la ïoh 21 tylli ki takma kiba kynthup ïa 6 tylli ki takma ksiar, 6 tylli ki takma Rupa bad 9 tylli ki takma rnong.
Ha ka ïakob ïaid March past, ka Mawlai Presbyterian Higher Secondary School ka la long ka nongjop.
Ha kane ka sngi la pynsam ïa ki khusnam kyrpang kiba kynthup ïa ki best athlete ha ki kyrdan bapher bapher.
Ha ka kyrdan Under-14 jong ka shynrang, ïa ka khusnam Best Athlete la ïoh da i Fenando Jarain na ka skul St. Francis D’Assisi Higher Secondary School katba ha ka liang ki kynthei pat, la ïoh da i heprit Ruma Deb na ka Skul Grace Care Academy.
Ha ka under-16 category, ïa ka khusnam best athlete jong ki shynrang la ïoh da u Hamebankhraw Mawlong na Christ Church Secondary School bad ka Laweibaphyrnai Lawriniang na ka skul Umrynjah Presbyterian School ka la ïoh ha ka liang ki kynthei.
Ha ka under-18 pat, ïa ka khusnam best athlete napdeng ki shynrang la ïoh da u Amosstar Syiemlieh na ka skul Mawlai Presbyterian Higher Secondary School bad ha ka liang ki kynthei pat la ïoh da ka Bakmenhun Shangpliang na ka skul MayQueen.
