Nongpoh, Nailar 07
Ka Ri Bhoi Archery Association (RBAA) kaba dei ka seng kaba la dep ban pynïasoh ïalade lane ‘affiliated’ bad ka Meghalaya Archery Association (MAA) ka la shim ïa ka rai ban leit ïashim bynta sha ka Meghalaya State Archery Championship 2026 ka ban sa long ha madan ïalehkai jong ka Sports Authority of India (SAI) ha nongbah Shillong naduh ka 10 tarik haduh ka 14 tarik jong u bnai Nailar mynta u snem.
Ïa katei ka jingthmu leit shim bynta sha katei ka lympung la pyntip da u President ka seng, u Bah Sumarlang Swer haba kren sha ki lad pathai khubor mynta ka sngi ha Nongpoh ha ka jingdon ryngkat jong kiwei de ki nongkitkam ka seng.
U Bah Sumarlang u la pyntip ruh ba ka jingshim rai ban leit ïashim bynta sha katei ka lympung ka long ban ai rynsan bad kyntiew ïa ki khun samla ka Ri Bhoi ba kin ïoh ban sei ïa la ki sap ki phong ha kane ka jaid jingïalehkai.
U la pyntip ruh ba ki don kumba 18 ngut ki rang bad ki thei ïalehkai na ka District kiban leit ïashim bynta sha katei ka lympung ha ka kyrdan Junior bad Senior kiba la ïoh ïa ka jinghikai pyntbit kaba kyrpang ha nongbah Shillong lyngba ka jingïarap jong ka MAA.
