Shillong, Nailar 09
Ka Meghalaya ka la shah pynngat ha ka thup kaba kham jwat jong ka Tiers 1 ha ka lympung ïalehkai National Football Championship na ka bynta ka Dr BC Roy Trophy 2026-27.
Kane ka la wan hadien ba ka All India Football Federation (AIFF) ka la pyllait ïa kane ka lympung ïalehkai jong ka Tiers 1 bad 2, kiba la thmu ban sdang naduh 25 tarik mynta u bnai haduh 9 tarik u Nailur. Ïa ka Tier 1 yn pynlong ha Bangalore Football Stadium kaba ha Bengaluru, katba ïa ka Tier 2 yn pynlong ha RK Ashram Ground kaba ha Narainpur, Chhattisgarh.
Ha kane ka lympung ka Meghalaya kaba la don ha ka Group-C, kan hap ban ïakhun pyrshah Mizoram, Tamil Nadu bad ka Maharashtra.
Kat kum ka kyrwoh ba la pyllait da ka AIFF, la ong ki don 16 tylli ki kynhun na baroh ar tylli ki kyrdan ïalehkai (tiers), ha kaba la phiah ïa ki ha ki saw tylli ki group, kiba don mar saw tylli ki kynhun. Te kumta ki saw tylli ki kynhun ki ban bat ïa ki kyrdan ba hakhlieh na kitei ki group, kin ïoh rung sha ka semi-final.
Lyngba ka jingpyntreikam ïa ka jingkyntiew kyrdan bad pynhiar kyrdan naduh ki lai tylli ki aïom ba la lah, ar tylli ki kynhun kiba la rung final ha ka aïom ïalehkai 2025-26, ka Uttar Pradesh bad ka Assam ki la kiew kyrdan sha ka Tier 1 na ka bynta ka aïom ïalehkai 2026-27. Kine ki kynhun kin mih bujli ha ka jaka ar tylli ki kynhun kiba la wan shatrai na ka Tier 1 jong ka aïom ba la lah, kata ka Chhattisgarh bad ka Jharkhand, kin ban ïakhun mynta ka aïom ha ka Tier 2.
Lah ban pynpaw ba ka Manipur ka la long la lahduh ha ka aïom ba la lah, hadien ba ka la lah ban pynliem ïa ka West Bengal da 3-0 kol ha ka jingïakhun final ha Amritsar.
Nalor ka Mizoram, Meghalaya, Tamil Nadu bad Maharashtra kiba don ha ka Group-C, kiwei pat ki kynhun ki la don ha la ki jong ki group ki long ka Manipur, Kerala, Telangana, Assam (Group-A), kumjuh ha ka Group-B ki long ka West Bengal, Punjab, Karnataka & Chandigarh, Group-C ka Mizoram, Meghalaya, Tamil Nadu & Maharashtra. Ha ka Group-D ki kynthup ïa ka Delhi, Goa, Odisha & Uttar Pradesh.
Kiwei pat ki kynhun kiba don ha ka Tier 2 ki long ka Andhra Pradesh, Pondicherry, Arunachal Pradesh & Himachal Pradesh (Group-A). Ha ka Group-B ki long ka Tripura, Andaman & Nicobar, Chhattisgarh, Dadra and Nagar Haveli & Daman and Diu. Ha ka Group-C ki long ka Bihar, Jharkhand, Uttarakhand & Rajasthan. Ha ka Group-D ki kynthup ïa ka Gujarat, Jammu & Kashmir, Madhya Pradesh & Sports Authority of India (SAI).
