Imphal, Nailar:
Ki bor pahara ha ka sngi Saitjaiñ, ha ka 8 tarik, Nailar ki la lap ïa ka jaka buh tiar siat, ki tiar pynbthei ba la suba ba ki dei ki tiar pynbthei (IED) bad ki tiar ïaleh thma na ka Khema Reserved Forest hajan ka Ophis jong u Forest Beat Officer ha Napet Palli ha Manipur Imphal East district.
Ïa kane ka jinglap la leh ha ka por ba pynlong ïa ka jingkhynra ha ka sngi Saitjaiñ. Ka jaka buh tiar ba la kurup ka kynthup ïa saw tylli ki suloi 9mm, kawei kawei ka suloi kaba don ïa u magazine, bad ar tylli ki suloi ba tang kawei ka ktang.
Ki bor pahara ki la ïoh ruh ban kurup ïa uwei u bom ba la suba ba u dei u bom IED ba khia kumba 4.6 kg, ryngkat bad 14 tylli ki bom kawang kti bad 162 tylli ki kuli bym pat pyndonkam jong ki jait kuli bapher bapher.
Ki tiar ba la ïoh kurup ki kynthup shuh shuh ïa 26 tylli ki kuli ba thylli, ar tylli ki magazine ba la pyndap kyli, ar tylli ki kuli stun bad uwei u kuli jri.
Napdeng kiwei pat ki tiar kiba la ïoh kurup ki long ki tiar shipai bad ki tiar kiba ïadei bad ka jingïaleh, kynthup ïa kawei ka BP iron plate, BP jacket cover, ka charger tiar siat, ka set ai khubor bad kiwei kiwei ki tiar.
Ïa ki tiar ïaleh, ki tiar siat bad ki tiar kiba la suba ba ki dei kiba lah ban pynbthei la rah noh na ka bynta ban tohkit bniah. Ki tnad pahara ki dang bishar bniah ïa ka jingsdang jong katei ka jaka rieh bad ka jinglah ban donkti jong ki kynhun lehnoh kiba treikam ha katei ka thaiñ.
