Shillong, Nailar 09
U nongtied ba kynsai ka India u Sarfaraz Khan u lah ban mih madan ha ka jaka jong u Sai Sudharsan, uba la mynsaw, na ka bynta ka jingïalehkai Test ka ban wan pyrshah ïa ka Sri Lanka, la pynpaw ki tyllong khubor na ka BCCI.
La sngewthuh ba u Sudharsan, u u dangdon hapdeng ka jingmynsaw, kaba lah ban pynduh ïalehkai na ka bynta ka jingvalehkai ka ban wan. Katkum ka tyllong khubor, la lah ban wanrah ïa u Sarfaraz ha ka kynhun kum u nongmih bujli ha ka jaka jong u. Ïa ka rai kaba khatduh halor kane ka kynhun ïalehkai la khmih lynti ba yn shim da ka Board of Control for Cricket in India (BCCI). “U Sarfaraz Khan u lah ban mih bujli ha ka jaka jong u Sai Sudharsan uba la mynsaw, na ka bynta ka jingïalehkai Test ban wan pyrshah ïa ka Sri Lanka” ong ka tyllong khubor na ka BCCI.
U Sudharsan u la don hapdeng ka jingshah sumar ha ka Centre of Excellence (COE) ha Bengaluru bad u la pyrshang ban ïashim bynta ruh ha ka jingkilanmet ban tied bad kawang bol. Hynrei une u nongtied um shym la lah ban ïoh biang ïa ka jingkoit jingkhiah ha ka por kaba biang na ka bynta ka jingïalehkai Test pyrshah ïa ka Sri Lanka, kaba la buh ban sdang ha Galle ha ka 15 tarik mynta u bnai.
U Sudharsan ruh um shym la leit lang bad ka kynhun jong ka India da ka liengsuiñ sha Sri Lanka bad kumta ula duh na ka bynta ki lai tylli ki jingïalehkai kilanmet hashwa ba kan ïakynduh pyrshah ïa ka Sri Lanka Cricket XI ha Colombo, kaba la sdang naduh ka sngi Thohdieng.
Ha kawei pat ka liang u kapten ka kynhun ïalehkai ka ri u Shubman Gill ruh u la ngat ha ka jingmynsaw ha ki bynta jong ka shynpriah kti kamon ha ka por ba u dangkilanmet kaba long shi bynta ka jingpynkhreh na ka bynta ka jingïalehkai Test kaba nyngkong pyrshah ïa ka Sri Lanka.
Na ka liang ka BCCI ka la thoh ha ka rtynsan jong ka X, “Ka jingpynbna shaphang u kapten u Shubman Gill u la mynsaw ha ki bynta jong ka shympriah kti kamon jong u ha ka por ba u dangkilanmet myn ha ka sngi Palei. Ban leit na ki jingmynsaw kaba jur, la bthah ïa u ba un ym shim bynta ha ka jingkilanmet jong ka sngi kaba nyngkong pyrshah ïa ka SLC XI. Ka Medical Team jong ka BCCI ka dangkhmih thuh ïa ka jinglong jingman ka jong u. U KL Rahul un ïalam ïa kane ka kynhun haba u Gill um lah ban ïadon lang.”
Na ka liang u Jasprit Bumrah ruh u la shah weng noh na kane ka series namar ba um pat koit pura na ka jingmynsaw ka khohsiew ka diang jong u, kaba u la ngat ha ka jingïalehkai ODI pyrshah ïa ka England.
Te kumta ka Selection Committee jong kane ka kynhun ka la kynthup ïa u Aquib Nabi hapoh ka kynhun n aka bynta ban mih bujli ha ka jaka u Bumrah.
Kumaba ka paw ka India ka la don bun ki rangïalehkai kiba la ngat ha ki jingmynsaw hashwa ban sdang kane ka series, ha kaba u Harshit Rana bad u Nitish Kumar Reddy ki la ngat ha ki jingmynsaw.
U Washington Sundar u la shah weng noh na kane ka jingïalehkai Test na ka daw ka jingmynsaw, katba u Akash Deep um pat ïoh ïa ka jingkoit kaba pura. Kane ka jingïalehkai ka long shun bynta ban pynkhreh ïa ka kynhun na ka bynta ka ICC World Test Championship 2025-27.
Hapoh ka jingïalam u Shubman Gill, ka India ka la don mynta ha ka kyrdan ba san ha ka World Test Championship, ha kaba la la jop saw sien bad shah rem saw sien ha ki khyndai sien ïakhun ha kaba ka Points Percentage (PCT) ka long 48.150.
