Shillong, Nailar 09
Tang katto katne taïew shwa ban rung sha ka rynsan ïalehkai jong ka Commonwealth Games, ka Jaismine Lamboria kam shym la poi pyrkhat ba kan khur takma namar kham hashwa ka la ïoh ïa ka jingpang shit met, hynrei kam shym la kyntait ban leit shim bynta.
Watla ka la pyndep ïa bun tylli ki test kiba ym shym la pyni eiei kaba pher ha ka, hynrei katei ka ‘thei ïakura ka la dih tang u dawai paracetamol ban ïoh ka jingïarap na ka jingpang jong ka. Namar ka jingjur palat ka jingshitom, ka la shah sumar ha kawei ka hospital ha Mohali. Khatduh ki doktor ki la lap ïa ka daw ka jingpang jong ka, ha kaba la sumar ïa ka haduh 14 sngi. Na ka bynta kane ka nongïalehkai kaba pynkhreh ïa ka jingïakop kaba heh tam jong u snem, ka lah ban long da kaba suk ba kan pynkut ïa ka jingïalehkai.
Ha ka jaka kata, ka la kylla long ka jingpynsah kynmaw ha ka jingim ïalehkai ka jong ka lyngba ka jingwanphai sha ka kam ïalehkai. “Nga la kiar na ki jingshah test kiba kham bniah namar ba ki kaiphod (report) ba nyngkong ki long biang kumba ju long. Ngim tip ïa kaei kaba dei ban sumar. Khatduh hadien ba nga la shah sumar, ki la lap ba nga ïoh pang na ki khñiang bad nga la dih dawai haduh 14 sngi,” la bynrap katei ka nongïakura kaba shim bynta ha ka kyrdan ïalehkai kaba 57kg.
Ynda la pyllait ïa ka na ka jaka sumar, ki jingmut jingpyrkhat jong ka ki long beit sha ka jingïalehkai namar ka dangsah sa tang lai taïew ban sdang ïa katei ka lympung.
“Te kumta nga la sdang ïa ka jigkilanmet ha ka 1 tarik u Naitung. Ha kaba nyngkong nga la sdang shwa da ka jingkilanmet da kaba ïaid bad pynkhih ïa ki kti ki kjat. Nga dangdon por sa tang khyndiat, te kumta nga la long kaba ïai shah ïa lade.”
Ka jingkoit jingkhiah ha ka met ka long tang kawei ka bynta jong ka jingeh. Ha kito ki taïew kiba la nga ïakynduh jingeh, ka Priya Vrinda (sports psychologist) ka la long ka nongkyrshan khnang ban pynïoh ïa ka jingsngewskhem na ka bynta ban weng na ka jingshitom ha ka met.
“Ha ka por ba nga pang, nga la don lypa ka jingïadei bad ka Priya Vrinda. Ka la ïarap ban pynïoh ïa ka jingmut jingpyrkhat ka jong nga kaba khlaiñ,” la ong ka Jaismine.
Kata ka jinglah ban shah ka la paw shai haba ka la wanphai biang sha ka jingïakop. Ka Jaismine ka la shim bynta ha ka jingïakura, da ka jingsngew skhem, ka la lah ban kyntiew ïalade na ka takma rnong ha ka Commonwealth Games jong ki saw snem ba la lah, sha ka takma ksiar ha ka 57kg.
Kawei na ki jinglah jong ka Jaismine haba ka don halor rynsan ïakura, ka la lah ban poi sha ka thong. “Ki coach jong nga ki la hikai ïa nga kumno ban pyndonkam hok ïa ka jinglah ka jong nga. Ka dei kane kaba la ai mynsiem ïa nga ba ngan kynjoh sha ka thong jong ka jingjop.”
