Jowai, Nailar 09
Ka West Jaiñtia District Sports Association (WJDSA) ka la pyndep ïa ka jingjied ïa ki nongïalehkai shynrang bad kynthei na ka bynta ka lympung ïalehkai State Athletic Champion-ship 2026.
Ïa ki nongïalehkai la jied ha ka jingpyrshang ne ka trials kaba la long ha madan Wahïajer Multi Sports Complex ha ka sngi Saitjaiñ.
Ki la don palat 100 ngut ki khynnah kiba la wan shim bynta ha kane ka jingpyrshang na kylleng ki shnong ka West Jaiñtia Hills District.
Ha kane ka sngi la don -lang u Working President ka WJDSA u Bah E M H. Passah, u Chairman ka Athletic Committee Bah Dari Lamare, u Athletic Secretary Bah K. Pasi nalor kiwei de ki dkhot ka WJDSA.
Na ka liang u Athletic Secretary u la ai khublei ïa ka Synjuk halor ka jingailad ïa ki khun samla ka district ban ïashim bynta ha kane ka jingpyrshang kumjuh ïa ka shlem treikam jong ka DSO kaba la ai sngewbha ïa ki tiar ki tar bad ïa ka shnong Wahïajer.
Baroh ki nongkren ki la pynsngew sha ki nongïashim bynta ba ka kam ïalehkai ka dei ka lad ïoh kam ïoh jam khamtam ha kajuk mynta nalor ba ka pynjngai ïa ki khun samla na ki kam sniew bad ka wanrah ruh ïa ka koit ka khiah ha ka met ka phad.
Te kumta ki la kyntu ruh ïa ki kmie ki kpa ba kin pynshlur ïa la ki khun jong ki ba kin pynmlien ba ki shim bynta ha ki kam ïalehkai.
