Shillong, Nailar 09
Ka All India Football Federation (AIFF) ka la ai por ïa ka Jamshedpur FC haduh ka 12 tarik mynta u bnai ba kan pyrkhat biang halor ka rai ban weng noh na ka samoi ïalehkai jong ka Indian Super League (ISL) 2026-27.
Ha ka 31 tarik Naitung, ka Jamshedpur FC kaba la long trai da ka Tata Steel ka la rai ban weng noh na ka jingshim bynta ha ka ISL jong ka aïom ka ban wan. Kane ka rai ka la pynkyndit ïa baroh, kynthup ïa ki nongïalehkai, ki coach, ki rangïalehkai barim, ki nongkyrshan bad ki para klob. U khlur ïalehkai phutbol ba paw ka ri u Sunil Chhetri u la ong ba kane ka la long ka jingpynkyndit ïa baroh.
Ki paidbah nongkyrshan ki la ïaid paidbah kum ka jingpyrshah, ki la pyllait ïa ki dorkhas online bad ki la pynher ïa ki lama ha ka jingïakhun Durand Cup pyrshah ïa ka SC Delhi, da kaba kyrpad ïa ki trai jong ka klob ban pynphai noh ïa ka rai jong ka.
Na ka liang ki paidbah nongkyrshan ki la buh ka jingkyrpang lyngba ki rynsan social media bad ki la buh ruh ïa ki jingthoh ha ka jingïakhun jong ka Durand Cup pyrshah ïa ka SC Delhi, da kaba kyrpad ïa ki trai jong ka klob ban weng noh ïa katei ka rai jong ka.
“Ka rai ban weng noh na ka ISL ka dei namar ka jingbym lah jong ka JFSPL (Jamshedpur Football and Sporting Private Limited) ban bei tyngka ha ka ban pynïaid ïa ka klob”, la ong u CEO jong katei ka klob u Mukul Choudhari kat kum ka jingthoh kaba u la phah lyngba ka email sha ka AIFF.
“Ka JFSPL ka shaniah ha ki nongbei tyngka halor ki jinglut jingsep jong ka kynhun ïalehkai. Ki nongkyrshan pisa ki la pyntip ba kim lah ban pynbiang ïa katei ka jingbei tyngka ne ka jingkyrshan ban pynïaid shakhmat ïa kane ka klob ha ka ISL.”
“Ka AIFF kan da sngewkmen eh lada ka Tata ka dangïai neh ha ka phutbol, khamtam eh ha katei ka lympung kaba heh jong ka ri. Lada ka jingkyrpad jong ka AIFF ka lah ban pynkylla ïa ka jingmut jingpyrkhat jong ki, ka AIFF ka kwah ban kyntu ïa ki, na ka bynta ka jingmyntoi jong ki nongïalehkai bad ka phutbol jong ka India, ba kin pynneh beit ha katei ka lympung ïalehkai jong ka ri,” la pynpaw u president ka AIFF u Kalyan Chaubey.
Ka Jamshedpur FC kaba la seng ha u snem 2017 bad ka la shim bynta nyngkong eh ha ka ISL 2017-18. Kane ka kynhun ka la bteng ïa ka kontrak bad ka jingsiew na ka bynta ki nongïalehkai, ki coach bad ki nongtrei jong ka.
Kane ka kynhun nongjop jong ka ISL Shield 2021-22 ka la pynpaw ba ha ka jaka kata kin pynleit jingmut ha ka ban kyntiew ïa ki sap ïalehkai jong ki khynnah lyngba ki shlem ai jinghikai, ka jinghikai kaba kham bniah bad kiwei.
