Shillong, Nailar 09
Ka All India Chess Federation (AICF) ka dangïaid shakhmat ban pynthikna na ka bynta ban pynlong ïa ka lympung ïalehkai Senior National Chess Championship hashwa ban kut jong mynta u snem hadien ba la pynpaw ïa ka jingsngew-khia halor ka jingpynbeit kaba nyngkong ïa kane ka lympung ha u Lber jong u snem 2027.
La sngewthuh ba ki heh jong ka AICF ki dangïakynduh man ka por bad ki nongshim bynta, kynthup ïa ka synjuk ïalehkai ka Jylla ka ban pynlong ïa kane ka lympung, na ka bynta ban pynbeit ïa ki tarik kiba la thmu ban pynlong ha u Naiwieng-Nohprah mynta u snem.
Kham hashwa la rai ban pynlong ïa kane ka Senior National Cham-pionship naduh 35 tarik u Lber haduh 4 tarik u Ïaïong jong u snem 2027, ha Varanasi kaba ha Uttar Pradesh, hynrei kane ka jingthmu ban pynkynriah ka long namar mynta u snem 2026 ym shym la don kino kino ki lympung ïalehkai chess hapoh ka ri.
“Ka kalendar ka la dap lut. Ka la long kaba eh bha ban ai jaka na ka bynta katei ka lympung. Hynrei, hadien ba ngi la ïakren bad ka kynhun, ngi la rai ban pynlong ïa ka ha u Naiwieng-Nohprah,” la ong uwei u heh jong ka AICF.
La sngewthuh ba ka jingdap ki lympung hapoh ka ka ri bad shabar ri ka la pynbor ïa ka synjuk ban pynsangeh noh ha kaba sdang ïa kane ka lympung ïalehkai, hynrei mynta ka AICF ka dangleh ïa kaba donkam baroh ban pynlong ïa kane ka jingïalehkai ha kaba kut jong une u snem.
Kane ka la wan hadien ba u Abhijeet Gupta, uba la jop san sien ha ka Commonwealth bad uba la ïohpdiang ruh ïa ka khusnam Arjuna, u la pynpaw ïa ka jingsngew -khia halor ka jingbuh kham hashwa, da kaba ong ba ka lah ban ktah jur ïa ki nongïalehkai.
Uwei na ki heh jong ka AICF u la ong ba ka synjuk ka buh hakhmat eh ïa ki jingïalehkai jong ki khynnah kiba dangrit rta (age group) khnang ba ki nongïalehkai kin lah ban rung sha ki jingïalehkai jong ka pyrthei khnang ba kan ym buh jingeh ïa ki. Ka lympung ïalehkai jong ki ‘senior’ kam don kano kano ka por ba la buh katkum ka rta, dei na kata ka daw ba la buh ïa ka na ka bynta hadien ha ka almanak ïalehkai.
