Shillong, Nailar 10
Ka jinglehkmen ha ka jingthep kol jong ka lympung ïalehkai jong ka Brazil, ka la kylla long ka jingsngewsih ha kaba u rangïalehkai ‘dien ka Coritiba, u Jacy Maranhao u la hap ha ka thliew kaba don hajan ka madan bad mynsaw ka kjat jong u.
Une u rangïalehkai ba 29 snem ka rta u la lehkmen hadien ba u la lah ban thep kol na ka bynta ban pynlong ïa ka Coritiba ba kan tam da 2-0 kol pyrshah ïa ka Chapecoense, ha ka minit kaba 41 jong ka lympung ïalehkai Brazilian Serie A.
Une u rangïalehkai ‘dien u la rah ïa ka bol bad u la thmu ban mareh shaba don ki paidbah nongkyrshan kane ka klob, ha kaba u la kynthih ha ka por ba u danglehkmen.
Hynrei kane ka jinglehkmen ka jong u ka la pynlong ba un hap pynban hapoh kawei ka thliew, kaba don mar syndah bad ka madan ïalehkai.
U Jacy u la lah ban kiew biang sha madan hadien ba u la hap bad u la bteng ban ïalehkai kumba katto katne minit jong ka kylla miet. Nangta la hap ban bujli noh ïa u namar ka jingmynsaw ha ki bynta jong ka kjat kaba u la ngat ha katei ka jingjia.
Ka jinglong jingman ka la nang pynsngewsih shuh shuh ïa une u rangïalehkai ‘dien jong ka Coritiba ha kaba lyngba ka jingbishar bniah na ka VAR ka la pynpaw ba ka dei ka ‘offside’. Te kumta ym shym la kheiñ kol.
Kane ka jingjia kam dei ka sien kaba nyngkong ba une u rangïa-lehkai phutbol ba un hap ha ka lynti ïaid ha Estadio Major Antonio Couto Pereira.
Ha u snem 2014, u rangïalehkai shakhmat ka Cameroon u Joel ruh u la kynthih shabar ka jingker katba u danglehkmen ha ka por ba ka Coritiba ka la jop da 3-1 ïa ka Sao Paulo. Hynrei u la hap pynban ha kajuh ka thliew ha kata ka jingjia.
