Itanagar, Nailar:
Ki nongtrei mon sngewbha ki la weng kumba 5,220 kg ki jaboh na ka wah Yagamso ha Itanagar ha ka jingpynkhuid kaba la pynlong ha ka sngi Saitjaiñ, 8 tarik u Nailar kum shi bynta ban kyntiew ïa ka jingpyndonkam ïa ki jaboh da ka jingkitkhlieh bad ban ïada ïa ki jaka um ba don ha ka thaiñ. Ïa kane ka jingpynkhuid shnong la pynlong lang da ka Youth Mission for Clean River (YMCR) bad ka Abralow Memorial Multipurpose Society, ryngkat ka jingkyrshan na ka Itanagar Smart City Development Corporation Limited.
Katkum ka jingong jong ki nongpynïaid, ki pliang bad ki klat kiba lah ban pyndonkam tang shisien ki dei ka bynta kaba bun tam jong ki jaboh ba la lum, ha kaba la sei haduh 9,000 tylli na ka wah. La lum ruh kumba 8,500 tylli ki lyng-khot dewbilat, ki sohkhawja bad ki pla ba la pynpoi online, katba ki jaboh plastik ki long kumba 8,000 tylli.
U Corporator jong ka Itanagar Municipal Cor-poration Ward No.10 u la ong ba ki kynhun seng bad ki nongïarap ki la don bynta ha kane ka jing-treikam bad u la kyntu ïa ki nongshong shnong ban shim ka jingkitkhlieh ban ïaleh ban ym bret pathar ïa ki tiar bym pyndonkam shuh.
U Yaro u la kyrpad ruh ïa ki briew ban kiar na kaba bret ïa ki jaboh sha ki wah bad kiwei kiwei ki jaka ba don um, da kaba ban jur ïa ka jingdonkam ban ïashim bynta kham bun ki paidbah ha kaba pynkhuid ïa ka mariang jong ka nongbah.
U Chairman jong ka YMCR u SD Loda u la kyrpad ïa ki nongshong shnong ban pyni ïa ka jingsngewkhia kaba kham khraw ïa ki wah ba marjan bad ban noh synñiang sha ki jingpyrshang kiba thmu ban ïada ïa ki wah na ka jingjaboh. U la kyntu ruh ïa ki briew ban pynphriang ïa ka jingtip shaphang ka jingsumar ïa ka mariang hapoh ki shnong ki thaw jong ki.
