Shillong, Nailar 10
Kan long ka jingsah kynmaw na ka bynta u khlur ïalehkai ka Jylla, u Hardy Cliff Nongbri ba un mihkhmat ha ka 135th IndianOil Durand Cup watla ka Nongkseh SS&CC kam shym la lah ban khur jingjop ha ki ar tylli ki jingïalehkai jong ka Group-E.
Ha ka jingïakhun ba la lah, ka Nongkseh ka la shah rem noh da 2-0 kol ha ka Shilllong Lajong bad hadien ka la ïakhaid mar 2-2 kol pyrshah ïa ka Langsning FC.
Na ka bynta u Hardy, ka long kawei pat ka jingïaid lynti kaba jlan bha watla u la hap ban ïakhun ïa ki rai eh rai dam jong ka jinglong ki madan ktieh bad kiba sniew ha kane ka Jylla.
“Nga la sdang ïa ka kam ïalehkai naduh ba nga dangdon ha ka rta kaba 7 lane 8 snem bad la ki paralok ha ka shnong ka jong ngi,” la pynpaw une u rangïalehkai uba la 29 snem ka rta.
“Ngim shym la don ki jaka ïalehkai kiba paka ne ki tiar kiba rem dor, hynrei ka dei ka jingïeid jong ngi ïa ka jingïalehkai phutbol. Ka jingïalehkai ha kito ki madan kiba sniew ka la hikai ïa nga ïa ka jinglong ba ryntih, ka jingïatreilang bad ka jingdonkam ban ym sangeh noh na kane ka kam ïalehkai.” Kum ki samla kiba la heh la san ha Meghalaya, ka phutbol kam shym la long tang ka jingïalehkai, hynrei ka dei ka bynta jong ka jingim kaba manla ka sngi. Man la ka jingïalehkai ba la ïalehkai ha ki madan shnong ki bym da biang ka wanrah ïa ka jingangnud ba kin ïoh ka lad ban rung ha ki shlem ai jinghikai kiba heh ha ka Jylla.
Kane ka jingtrei shitom ka jong u ka la urlong ba ha u snem 2009 ha kaba u la shah jied ban mihkhmat ïa ka kynhun ïalehkai Under-13 ka Meghalaya hadien ba u la lah ban pynpaw ïa ka jingtbit ka jong u. U la ïoh rung hapoh ka shlem ai jinghikai jong ka Sports Authority of India (SAI) Training Centre, Shillong shwa ba un rung sha ka kynhun ïalehkai (youth team) jong ka Shillong Lajong ha u snem 2011.
Ha ki katto katne snem kiba hadien, u Nongbri u la nangkiew stet bad long uwei na ki rangïalehkai ba lah ban shaniah, ha kaba u la ïoh rung hapoh ka kynhun ïalehkai I-League jong ka Shillong Lajong. Ha kane ka jingïaid lynti, u la ïoh jingmut na ki para nongïaleh-kai kiba la pynwan dur ïa ka jingsngewthuh jong u shaphang kane ka jingïalehkai.
“Nga la ïoh mynsiem lyngba ki rangïalehkai kum u Bah Aiborlang Khongjee bad Bah Rokus Lamare. Haba nga peit ïa ka rukom kilanmet ka jong ki bad ka rukom ïalehkai jong ki ka la ai mynsiem shibun eh ïa nga,” u la bynrap.
Te kumta u Nongbri u la nangkiew shaphrang ha ka kam ïalehkai ka jong u. U la mihkhmat ïa ka Shillong Lajong ha ka I-League bad uba la bat ruh kum u kapten ïa kane ka klob.
Watla kiba bun ki dangkhmih lynti ba un dangkiew sha kiwei pat ki rynsan ïalehkai kiba kham heh, hynrei u Hardy hadien ba u la mih noh na ka SLFC, ban wan ïalehkai biang sha ka Shillong League na ka bynta ka Nongkseh ha ka First Division 2025 bad ka la rah syndon ïa ka nam lahduh.
Kam shym la long ka rai kaba suk. Shuwa ba un jam shakhmat, u Hardy u la ïakren shwa bad la kiba ha ïing ha sem jong u, kiba la kyrshan ïa ka jingjied jong u. Kaba kham kongsan ka long ba u ngeit ha ka jinglong hok bad ka jingangnud jong u President jong ka klob u Bah Daniel M. Thangkhiew.
Ha ka jaka ban peit ïa ka Nongkseh kum ka klob kaba shadien, u la ïohi pynban ba ka lah ban kiew shaphrang ha kane ka jingïaid lynti ka jong u bad kane ka la urlong ha kaba tang ha ka shi aïom ka Nongkseh ka la lah ban khur haduh saw tylli ki trophy. Kine ki kynthup ïa ka First Division 2025, 5th Meghalaya State League (MSL), SSA Champions Cup 2025, ryngkat ka All India Chief Minister’s Gold Cup ha Sikkim.
Kane ka klob ka la jop ruh ïa ki kynhun ba paw kum ka NEROCA FC, Red Panda FC bad ka BSF Jalandhar.
“Ka jingjop ïa ka Chief Minister’s Gold Cup ka long kaba kongsah eh ïa nga,” u la bynrap. “Ka dei ka lympung kaba paw, bad ka jingjop na ka bynta ka Nongkseh ka long kaba kyrpang.”
