Shillong, Nailar 10
Ka All Meghalaya Sepaktakraw Association (AMSA) ka la pynkhreh bha ban leit ïashim bynta ha ka 29th National Sepaktakraw Championship 2026 ka ban long ha Jammu and Kashmir naduh 6 haduh 10 tarik u Nailur mynta u snem.
U President ka AMSA u Bah Samuel Hashah haba kren bad ki nongthoh khubor u la pynpaw ba ki khynnah ïalehkai ki la pynkhreh bha bad ki don ka jingkyrmen ba kin lah ban ïalehkai bha.
U la ïathuh ba ha kine ki bnai ba la dep ki la ïoh ban leit shim bynta sha Ranchi bad u la ïalam tang ïa ki khynnah shynrang. Hynrei ha kane ka kynti ba mynta ruh u don ka jingkyrmen ba ki khynnah kin lah ban ïalehkai bha khnang ba ki lah ban wanrah nam bad burom ïa ka Jylla.
U la kyntu ruh ïa ka sorkar ban kynthup lang ïa kane ka jingïalehkai ha ka 39th National Games ka ban sa long ha ka Jylla ha u snem 2027. “Lada ka sorkar ka shim khia bad kynthup lang ïa kane ka jingïalehkai kan long ka lad ba ki khynnah kin ïoh ban pyni ïa ka sap kaba ki don.”
Shuh shuh une u President ka synjuk u la ïathuh ba ka National Federation ka la dep ban ïakren bad ka President jong ka Indian Olympic Association (IOA) bad ruh ïa u Myntri ba dei peit ïa ka tnat ïalehkai jong ka Sorkar Pdeng u Mansukh Mandaviya halor ka mat ban kynthup lang ïa ka Sepaktakraw. Baroh ka shong ha ka Sorkar Jylla bad ka donkam ban ïakren ban kynthup lang ïa kane ka jingïalehkai. “Kumba ngi tip ba ïa ka Sepaktakraw la ju kynthup lang ha ki National Games kiba la pynlong ha bun tylli ki Jylla kynthup ruh ha Goa.”
Na ka liang ka Coach jong kane ka jingïalehkai kaba hapoh ka shlem ai jinghikai jong ka SAI Training Centre, ka Bidhumukhi ka la ong ba ka kynhun ka la pynkhreh ïa ka jingleit ïashim bynta ha ka 29th National Sepaktakraw Championship. Te kumta ki khynnah ïalehkai kynthei bad shynrang mynstep bad janmiet ki la kilanmet bha hashwa ban leit ïashim bynta sha kane ka lympung.
Ka la ong ruh ba ka don jingkyrmen ba ka kynhun ïalehkai kan lah ban mihkhmat ïa ka Jylla ha National Games ka ban long ha u snem 2027 ha kane ka Jylla bad kyrmen ruh ba kin lah ban ïalehkai bha na ka bynta ban wanrah nam bad burom ïa ka Jylla hi baroh kawei.
