Khliehriat, Nailar 10
Ka East Jaiñtia Hills District Football Association (EJHDFA) ka la sdang ïa ka lympung ïalehkai 2nd Division Football Tournament ha ka 8 tarik mynta u bnai ha madan artificial turf Diengshynrum, Khliehriat.
Ha ka jingïalehkai kaba nyngkong, ka Moolamanoh SC ka la jop da 3-0 kol ïa ka Mukhaïalong. Ïa kine la thep da u Ambison Dkhar ha ka minit kaba 19, kumjuh u Adoffstive Dkhar (40), bad u Jesper Dkhar (58).
Ha ka jingïalehkai kaba bud hapdeng ka Mulieh YWSC Suchen bad Lakadong Ummat SSC ki la ïasam mar shi poiñ hadien ba ki la ïakhaid mar 2-2 kol.
Ïa ki kol jong ka Lakadong Ummat la thep da u Elyfirst Shadong ha ka minit 43 bad u Namlangki Shadong (74). Katba ka Mulieh ka la pynphai kylla lyngba u Christopher Dkhar ha ka minit 51 & 70.
Haba phai sha kawei pat ka jingïalehkai kaba khatduh hapdeng ka Wapung Shnong SCSC bad Suchen Lumïarain SC ki la kut ha ka jingïakhaid hadien ba kim shym la lah ban thep kol.
