Shillong, Nailar 11
Ka Nongkseh SS&CC ka la pynkut ïa ka lympung ïalehkai 135th IndianOil Durand Cup da ka jingjop ïa ka Mumbay FC da 7-0 kol ha ka sngi Ba-ar ha Jawaharlal Nehru Stadium kaba ha Polo.
U Hardy Cliff Nongbri bad u Dawancha Carlos Challam ki la thep mar ar kol, katba ïa ki shi kol la thep da u Kitboklang Pale, Chesterpoul Lyngdoh bad u Sheen Stevenson na ka bynta ban pynlong ïa kane ka kynhun ban wan ha ka kyrdan ba-ar ha ka Group-E.
Watla ki paidbah nong -peitkai ki la kwah ban sakhi ïa ka jingwan shim bynta lang u trai ka Mumbay u Tiger Shroff, hynrei phewse shisngi shwa ban sdang kane ka jingïalehkai kaba khatduh utei u tyngshop Bollywood u la pynbna ïa ka jingbym lah ka jong u ban ïashim bynta ha kane ka lympung.
Ka jingwan ka Nongkseh ha ka kyrdan ba-ar ka la wan hadien ba la ïaryngkat mar 4 poiñ bad ka Langsning FC ha ki lai sien ïakhun, hynrei ka la tam lyngba ka jingïapher ha ka jingthep kol.
Kumba ka long mynta ka Shillong Lajong FC ka diangbat ïa ka kyrdan ba hakhlieh da kaba kamai 6 poiñ na ki ar sien ïakhun. Te kumta ka Shillong Lajong bad ka Langsning FC ki dangsah sa mar shisien ïakhun na ka bynta ban ïaknieh rung sha ka quarter final. Katba ka Mumbay FC kaba don ha ka kyrdan ba shatrai khlem da lah ban kamai poiñ bad ka Nongkseh, ki la duh ïa ka lad ban jam sha kawei pat ka wat jingïakhun na kane ka group.
Ha kane ka jingïakhun kaba khatduh ka Nongkseh ka la lah ban ïalehkai bha naduh kaba sdang ha kaba u Pale u la ïoh ban shut najan ryngkat bad u AenamJurwa bad u Chesterpaul, hynrei kim shym la lah ban pynurlong na ka daw ka jingïashan tyngeh ban pyllait na ka jingshah thep.
Dei ha ka minit kaba 11 ba u Chesterpaul u la shah pynur hapoh ‘box’ ha u rangapkol ka Mumbay u Pratik Jadhav. Te kumta u Hardycliff u la lah ban pynurlong ha kaba u rangapkol ka liang pyrshah um shym la lah ban pyllait na ka jingshah thep.
Hashwa ban kut ka kylla step, ka Nongkseh ka la pynbud biang ïa ka kol kaba ar lyngba u Kitboklang Pale ha ka minit kaba 41 na ka bynta ban tam da 2-0 kol.
Hadien ba la bteng biang ïa ka jingïakhun jong ka kylla miet, ka Nong-kseh kam shym la ailad ïa ka liang pyrshah na ka bynta ban thom naphang ha kaba u Chesterpoul u la ïoh ban thep kol ha ka minit kaba 56.
Kane ka kynhun ka la thep biang sa ar kol lyngba u Dawancha Carlos Challam (76) bad u Hardy Cliff (79). Hashwa ban wai kane ka kynhun ïalehkai ka nongbah ka la ïoh ban thep biang sa ar kol lyngba u Dawancha Carlos (81) lem bad u Sheen Stevenson (89) na ka bynta ban khur syndon ïa ka jingjop.
Haba phai sha ka NorthEast United FC ka la lah ban pynthikna ban jam sha ka quarter-final hadien ba ka lah ban pynliem noh ïa ka FC1 da 3-1 kol ha ka jingïalehkai kaba khatduh jong ka Group-F ha Indira Gandhi Athletic Stadium, Guwahati.
Kane ka nam jop ka la wan urlong lyngba u Parthib Gogoi u la thep ar kol ha ka minit kaba 11 & 54 bad u, Alaaeddine Ajaraie (68′). Hynrei ka FC1 ka la pynphai kylla shi kol lyngba u Mohamd Ilyas (71′).
Kumba ka paw ka NEUFC kaba long ka lahduh ha u snem ba la lah, ka la bat ïa ka kyrdan ba hakhlieh da kaba kamai 9 poiñ na ki lai sien ïakhun, katba ka Bodoland FC bad ka FC1 ki la kamai mar 3 poiñ.
