Imphal, Nailar:
Ka ïingbishar bahakhliehduh ka la bthah ïa ka komiti ba la thung da ka ïingbishar jong ka kaba la khlieh da ka nongbishar barim jong ka ïingbishar bahakhliehduh ka Gita Mittal ban pynshisha ïa ki jingkynnoh ba kumba 24 hajar tylli ki longïing kiba shah ktah ha ka jingshah thombor jong ki jaitbynriew ha Manipur ha u snem 2023 ki dang hap ban ïoh ïa ki jingmyntoi na ka bynta ka jingpynbha bad ka jingmyntoi.
Ka ïingbishar kaba kynthup ïa u Chief Justice Surya Kant bad ki Nongbishar Joymalya Bagchi bad ka V Mohana ki dang bishar ïa ki mat kiba ïadei bad ka jingpynbha pat ïa ki briew kiba la duh noh ïa ki ïing ki sem, ki jaka sah bad ki lad kamai ha ka por ba jia ka jingshah thombor.
Ka ïingbishar ka la shim khia ïa ki sienjam ba la shim da ka sorkar na ka bynta ban pynbha, kynthup ïa ka jingai pisa sha palat 4,000 ngut ki nongioh jingmyntoi na ki kumba 7,000 tylli ki longïing ba la ithuh na ka bynta ban tei pat ïa ki ïing.
Hapoh ka skhim pynbha pat, ka sorkar ka ai pisa T.5 lak na ka bynta ka ïing kutcha bad T.7 lak na ka bynta ka ïing semi-pucca ne pucca, la kdew ka kynhun nongbishar.
Palat 12,000 tylli ki ïing la mynjur ruh hapoh ka Pradhan Mantri Awaas Yojana-Gramin (PMAY-G) na ka bynta ki longïing kiba shah ktah na ka jingshah thombor, ong ka ïingbishar haba shim khia ïa ki jingai jingmut jong u nongïasaid aiñ ba rangbah u Vibha Dutt Makhija, uba mih na ka bynta ka Justice Gita Mittal Committee.
Ka kynhun nongbishar ka la kdew shuh shuh ba la shna ïa ki jaka sah ba shipor bad la pyllait T.51.95 klur na ka bynta ki 885 ngut ki nongïoh jingmyntoi ba la ithuh na ka bynta ki ïing ba neh. La ai pisa shuh shuh T.1 lak na ka bynta kawei ka longïing sha ki longïing kiba la shah pynjulor pura ha ki ïing jong ki.
Hynrei ki nongïasaid aiñ kiba mihkhmat ïa ki katto katne ki longïing kiba shah ktah ki la kam ba kumba 24,000 tylli ki longïing ki dang ap ïa ki jingmyntoi, ka jingkynnoh kaba ki la ong ba lah ban pynshisha ha ka jaka. Ka kynhun nongbishar ka la kdew ba ïa ki jingtip ba bniah jong kine ki longïing la dep ban aiti sha ka komiti kaba don lai ngut ki dkhot.
“Lada ka long kumta, ngi kyrpad ïa ka komiti ban pynshisha bad pynskhem ïa ki jingtip ba bniah jong ki longïing ba la kynnoh ba ki shah ktah,” ong u nongbishar rangbah Surya Kant, da kaba bthah ïa ka kynhun ban aiti ïa ka jingthoh halor ka jingpyntreikam ïa ki skhim ai jingmyntoi jong ka sorkar ba la ithuh da ka ïingbishar ha ka hukum jong ka ha ka 27 tarik, Jymmang, 2026.
Ka ïingbishar bahakhliehduh ka la phah ruh ïa ka aplikeshon kaba ïadei bad ki mar ki mata kiba dei jong ki longïing kiba shah ktah ha ka jingshah thombor sha ka komiti ba la ïalam da ka Justice Mittal.
