Khliehriat, Nailar 11
Ka lympung ïalehkai 2nd Division Football Tourna-ment ba la pynïaid da ka East Jaiñtia Hills District Football Association ka la nangjam shaphrang ha ka sngi Ba-ar ha madan artificial turf Diengshynrum, Khliehriat.
Ha ka jingïakhun kaba nyngkong hapdeng ka Moosiang Lamare New YWOSC bad ka Lumshken SC ki la ïasam mar shi poiñ hadien ba ki la ïakhaid mar 1-1 kol.
Ka Moosiang Lamare ka la pynkhih jar nyngkong eh lyngba u Fasterjoy Pariat ha ka minit kaba 30, hynrei ka Lumshken SC ka la pynphai kylla lyngba u Ram Bareh ha ka minit kaba 59 jong ka kylla miet.
Ha ka jingïalehkai kaba bud, ka Narwan SCSC ka la jop 3-1 kol ïa ka Rangad SCSC. Ïa ki kol jong ka Narwan la thep da u Pyrkhatlang Sumer ha ka minit kaba 24, kumjuh u Arhowni Shadap (32) bad u Jimris Langstang (34). Na ka liang ka Rangad SCSC ka la pynphai kylla shi kol lyngba u Yoome Lamurong ha ka minit kaba 28.
Haba phai sha kawei pat ka jingïalehkai kaba khatduh hapdeng ka Ratacherra CSC bad ka Umlyngsha YWSC ki la ïakhaid mar 1-1 kol.
Na ka liang ka Ratacherra ka la pynkhih jar nyngkong eh lyngba u Gradely Mylliemngap ha ka minit kaba 42, hynrei ka Umlyngsha ka la pynphai kylla lyngba da ka jingbakla thep hi da u rangïalehkai ka Ratacherra u Housekeeper Pohleng ha ka minit kaba 80+8.
