Nongstoiñ, Nailar 11
Ka Athletic Committee jong ka Nongstoiñ District Sports Association ( NDSA) kan pynlong ïa ka prokram jied ïa ki khynnah napoh ka West Khasi Hills District ban leit mihkhmat sha ka State Athletic Champion 2026 ka ban long ha nongbah Shillong.
Katkum ka kyrwoh khubor na u General secretary ka NDSA, la pynpaw bad kyrpad ïa ki khynnah shynrang bad kynthei ba kin shim ïa kane kum ka jingpyntip ïa baroh. U la ong ruh ba ki jait jingïalehkai na ka bynta ki khynnah kynthei bad shynrang ki long ka 100mts, 200mts, 400mts bad 800mts. Nangta kin don ruh ki jingïakop mareh kiba kham jngai kum ka 1500mts, 5000mts, 10000mts bad kiwei kiwei ki jait jingïalehkai.
Ki khynnah kiba la shim bynta ha katei ka prokram jied ka dei ban long kiba la kha hashwa ka 30-03-2009 bad ka tarik ban pynlong ïa katei ka prokram kan long ha ka 13, 14 bad 17 tarik mynta u bnai. Ïa ka jaka yn pynlong ha madan NDSA ha Nongpyndeng naduh ka por 7 baje mynstep. Ïa ki jingtip ba khambniah ki lah ban ïakynduh ïa ki nongïalam ka NDSA.
