Shillong, Nailar 12
Ki khynnah siat khnam na ka South West Khasi Hills District, ki la ïoh ban lamkhmat ha ka miej ïakheiñ takma ha ka sngi kaba ar jong ka lympung ïakob siat khnam ba la tip kum ka Meghalaya State Archery Championship, kaba la long ha madan ïalehkai ka SAI Training Centre, ïa kaba la pynlong da ka Archery Association of Meghalaya.
Kat kum ka kyrwoh ba la pyllait, ka kynhun ka South West Khasi Hills District tad haduh ba kut ka sngi kaba ar jong kane ka jingïakob ka la khur haduh 13 tylli ki takma, ba kynthup 5 tylli ki takma ksiar, bad mar 4 tylli ki takma rupa bad rnong.
Ka district kaba don ha ka kyrdan kaba ar dei ka West Khasi Hills kaba la ïoh ban khur baroh 11 tylli ki takma, ba kynthup 4 tylli ki takma ksiar, 2 tylli ki takma rupa bad 5 tylli ki takma rnong.
Ka district kaba don ha ka kyrdan kaba lai dei ka East Jaiñtia Hills District kiba la khur 7 tylli ki takma, kynthup ïa 3 tylli ki takma ksiar bad mar 2 tylli ki takma rupa bad 2 tylli ki rnong.
Katba ka kynhun napoh East Garo Hills ka la don ha ka kyrdan kaba saw hadien ba ki la ïoh ban khur 3 tylli ki takma ksiar, 1 ka takma rupa bad 2 tylli ki takma rnong. Ka East Khasi Hills ka la don ha ka kyrdan kaba san hadien ba ki la khur kawei ka takma ksiar bad 4 tylli ki takma rupa.
Lada shu ïa khmih bniah, ha kane ka jingïakob, jan baroh ki district ki la ïoh ban khur ïa la ki jong ki takma, lait noh tang ka kynhun napoh North Garo Hills ki bym pat shim la lah satia ban khur takma.
Haba phai sha ka jing-ïakhun ka kyrdan ïalehkai jong ka Indian Round, la pynïakhun naduh ka kyrdan ki Sub-Junior shaduh ki Senior kynthei bad shynrang ïa kaba la bynrap lang ïa ki jingpynïakhun jong ka ïakob siat para marwei, siat kynhun bad mixed team.
Ia kane ka lympung ïakob kaba lai sngi yn pynhap pyrda noh ïa ka mynta ka sngi Palei ha kaba shwa ban pynkut yn sakhi ïa ka jingpynïakhun ïa ka kyrdan ïalehkai jong ka recurve bad ka compound.
