Shillong, Nailar 12
Ka Mawpat SC, Pay For Right Football Academy (PFRFA) lem bad ka Marbisu SC ki la khur jingjop ha ka lympung ïalehkai Second Division Football League 2026 ba la pynïaid da ka Shillong Sports Association (SSA) ha ka sngi Balang.
Ha ka jingïakhun kaba la long ha SSA Stadium ha Polo, ka Mawpat SC ka la pynliem noh ïa ka Madan S&CC da 2-0 kol. Ïa kine la thep da u Donboklang Lyngdoh ha ka minit kaba 67 bad kawei pat da u Oliver Pale (73).
Kumjuh ha ka jingïakhun kaba la long ha madan MFA, ka PFR ka la jop da 6-2 kol ïa ka Lumshyiap SC.
Ha kane ka jingïakhun, ka PFR ka la pynkhih jar nyngkong eh lyngba u Pynshngaiñ Mujai ha ka minit kaba 23 na ka bynta ban tam da 1-0 kol ha ka kylla step. Kane ka kynhun ka la thep biang sa san kol ha ka kylla miet lyngba u Peter Lamare (49 & 68), Frankystar Shabong (58) bad u Refielostar Nongkynrih (79 & 90+4).
Na ka liang ka Lumshyiap ka la pynphai kylla ar kol lyngba u Brandon Lyngdoh (57) bad u Damanki Syngkli (89) hashwa ba kan mad ïa ka jingshah rem.
Haba phai sha kawei pat ka jingïakhun kaba la long ha SSA Stadium, ka Marbisu SC ka la pynliem noh ïa ka Nongrah SC da 1-0 kol bad ïa kane la thep da u Nicholas Swer ha ka minit kaba 39.
