Shillong, Nailar 13
Ka Shillong Lajong FC ka la jam sha ka quarter-final ha ka 135th IndianOil Durand Cup, hadien ba ka la ïakhaid mar 3-3 kol bad ka Langsning FC ha ka jingïalehkai kaba khatduh jong ka Group-E, ha ka sngi Palei ha Jawaharlal Nehru Stadium.
Kane ka jingïakhaid ka la biang pura ïa ka Shillong Lajong ba kan bat ïa ka kyrdan ba hakhlieh ha kane ka group bad kamai 7 poiñ, katba ka Langsning ka la lah ban wanphai biang sha ka kyrdan ba-ar bad kamai 5 poiñ. Hynrei ka Nongkseh ka la hiar sha ka kyrdan balai bad 4 poiñ lem bad ka Mumbay FC kaba don ha ka kyrdan ba shatrai khlem da lah ban khur jingjop ha baroh lai sien ïakhun.
Kane ka jingïakhaid ka la wan urlong lyngba ki ar kol ba la thep da u Joao Vitor de Paula Morais (Jota) hashwa ba u Everbrighton Sana un bynrap pat sa shi kol na ka bynta ka Lajong. Hynrei ka Langsning ka la ïakhun tyngeh ha kaba ka lah ban pynphai kylla lyngba u Kyrmen-skhem Mukhim, Wadajied Kynsai Ryngkhlem bad u Syed Ahmed, uba la lah ban thep hashwa ban wan.
Ki bor pynïaid ki la pynthikna ruh ba ka East Bengal na Group-A bad ka Jamshedpur FC na ka Group-C, ki la ïoh jaka ban rung sha ka quarter-final hadien ba ki la wan ha ki kyrdan ba-ar lyngba ka jingïapher ha ka jingthep kol bad kane ka shong ha ka jinglah ban ïalehkai bha jong ki ha kane ka lympung
Haba phai khyndiat sha katei ka jingïalehkai kaba khatduh ha kane ka nongbah ka la long kaba ïtynnad bad kaba ïakhaid bha namar baroh ar tylli ki donkam ban lait na ka jingshah rem. Ka Shillong ka donkam tang ban shu pynïakhaid khnang ban rung sha ka quarter final, katba ka Langsning ka donkam ban khur ïa ki lai poiñ, hynrei kane kam shym la urlong ïa kane ka kynhun hapoh ka jingïalang u Bah Khlaiñ Pyrkhat Syiemlieh (coach).
Ha ka kylla step ka Shillong Lajong ka la ïoh ban thep ar kol lyngba u Jota ha ka minit kaba 26′ & 30′. Hadien ba la bteng ïa ka jingïakhun jong ka kylla miet ka Langsning ka la lah ban pynphai kylla ar kol lyngba u Kyrmenskhem (49′) bad u Wadajied 63′.
Hashwa ban wai ka Lajong ka la thep biang sa shi kol lyngba u Sana (83′) hashwa ba u Syed Ahmed (90+1′) un pynphai kylla na ka bynta ban pynïakhaid kylla ïa ka Langsning.
Kiwei pat ki hynriew tylli ki kynhun kiba la rung quarter final ki long ka Mohun Bagan Super Giant (Group-A), Indian Army FC (Group-B), SC Delhi (Group-C), FC Raengdai (Group-D) bad ka NorthEast United (Group-F).
