Shillong, Nailar 13
Ka South West Khasi Hills ka la ïoh ban bat kum ka district kaba hakhlieh duh ha ka lympung ïakop siatkhnam jong ka Meghalaya State Archery Championship 2026 ha kaba ka la khur haduh 25 tylli ki takma, ha ka sngi kaba lai kaba la poi sha kaba kut noh ha ka sngi Palei.
Ha kane ka lympung kaba la neh lai sngi kynthih, la wan shim bynta da 200 ngut ki nongïalehkai na baroh ki 12 tylli ki district. Ïa kane ka lympung la pynlong da ka Archery Association of Meghalaya ha SAI Training Centre kaba long shi bynta jong ka jingpynkhreh ïa ka National Games 2027 ha kane ka Jylla.
Lah ban kdew ka SWKH ka la ïoh ban lamkhmat ha kaba kut jong ka sngi kaba ar ha ka sngi Balang lyngba ka jinglah ban khur takma ha ka jingïakop jong ka Indian Round bad ka la bteng biang ïa kane ka kyrdan lyngba ka jingkhur takma sa na ka compound bad ka recurve. Hadien ba ka la khur sa 12 tylli ki takma hynne ka sngi, ka SWKH ka la lah ban pyndep da kaba khur 8 tylli ki takma ksiar, 10 ki takma rupa bad 7 tylli ki takma rnong.
Katba ka East Khasi Hills ka la wan ha ka kyrdan ba-ar da kaba ka la khur 7 tylli ki takma ksiar bad rupa lem bad 4 ki takma rnong.
Ka West Khasi Hills ka la wan ha ka kyrdan balai da khur mar 6 tylli ki takma ksiar, rupa bad rnong. Katba ka Ri-Bhoi (4G, 2S, 4G) ka la wan basaw. Ka East Jaintia Hills (3G, 3S, 3B) ka la bat ïa ka kyrdan basan da kaba ka la tam ïa ka East Garo Hills (3G, 2S, 3B) da kawei ka takma rupa.
La ïadon lang ha kane ka sngi kaba khatduh ryngkat u Myntri ka tnat ïalehkai ka Sorkar Jylla u Bah Wailadmiki Shylla, ha kaba u la pynlut ïa ka por haduh 3 kynta ban sakhi ïa kane ka jingïalehkai lyngba ki sap ba kyrpang ki nongïalehkai siatkhnam.
Ha ka jingkren ha ka jingïalang pynkut ïa kane ka lympung, u Bah Shylla u la ong ba ka long kaba sngewtynnad ban ïohi ba ym shym la don kano kano ka district ka ban kham tam bun, hynrei ka jingïakhun ha kane ka lympung ka long kaba ïakhaid bha.
“Nga ai khublei ïa ka Archery Association of Meghalaya kaba trei shitom na ka bynta ban kyntiew ïa kane ka jingïalehkai ha ka Jylla,” u la bynrap da kaba ai khublei ïa ka synjuk halor ka jingjop jong kane ka lympung ïalehkai.
U Bah Shylla u la ai ka jingïaroh ruh ïa ka AAM namar ba ka long kawei na ki seng kaba trei shitom ha ka jingpynkhreh ïa ki kynhun na ka bynta ka 39th National Games 2027 ka ban long kane ka Jylla.
Kiwei pat kiba la ïadon lang ha kane ka sngi ki long u General Secretary ka Meghalaya State Olympic Association u Bah Finely L Pariat, kumjuh u Joint Secretary ka MSOA u Bah P. Laloo lem bad kiwei ki nongïalam ka AAM.
