Shillong, Nailar 13
Ka Meghalaya Police ka la pynkup burom ïa ki lai ngut ki khlur ïalehkai kiba la lah ban pynpaw ïa ka jingtbit jong ki ha ki lympung ïalehkai kiba la long ha ka Jylla bad wat shabar ruh kumjuh.
Kine ki nongïalehkai bad kiba don mynta ha kam pulit, ki long ka Dakahi Kyndait (Ri-Bhoi D.E.F), Eva Waynie Marbaniang (SF-10) bad u Khrawbok Marweiñ (MPRO).
Ka Dakahi ka la wan ha ka kyrdan ba nyngkong ha ka liang ki kynthei ha ka Ladakh Trail to Heaven 100K World Championship 2026, katba ka Eva Waynie (51-54kg) ka la khur ïa ka takma ksiar bad ïoh ruh ïa ka nam Best Boxer (Women) ha ka State Elite Boxing Championship 2025-26 lem bad u Khrawbok (47-50kg) u la khur ïa ka takma rnong ha ka State Elite Boxing Championship 2025-26.
Ïa kine ki nongïalehkai la pynkup burom da ka Director General of Police (DGP) ka Kong Idashisha Nongrang (IPS) ha ryngkat ka jingïadon lang ki heh pulit bad kiwei kiwei.
