Shillong, Nailar 16
Ka Shillong Lajong FC ka la long ba la pynkhreh ban ïakhun pyrshah ïa ka NorthEast United FC ha ka quarter final jong ka lympung ïalehkai 135th Durand Cup, ka ban long mynta ka lah sngi U Blei ha JN Stadium Polo.
Kane ka long ka sien kaba lai ba kine ki kynhun ki la ïakynduh teng ha u snem ba la lah, ha kaba ka NEUFC ka la khur jingjop da 2-1 kol, ha kaba u Ajaraie u la thep ar kol bad u Figo Syndai u la lah ban thep shi kol na ka bynta ka Lajong. Kine ki kynhun ki la iakynduh biang ha ka semi-final, a kaba u Redeem Tlang u la ïoh ban thep shi kol na ka bynta ka NorthEast hashwa ba kan rung sha ka final.
Ka jingïoh rung ka Shillong Lajong sha ka quarter final ha kane ka kynti kaba mynta ka la wan hadien ba ka la wan ha ka kyrdan ba hakhlieh ha ka Group-E hadien ba ka la kamai 7 poiñ na ki lai sien ïakhun, katba ka NorthEast United ka la ïoh ban lamkhmat ha ka Group-F ha kaba la khur jingjop ha baroh lai sien ïakhun bad ban kamai 9 poiñ.
Kumba ka paw na katei ka jingïakhun jong ka Group-E, ka Shillong Lajong ka la lah ban pynliem nyngkong da 5-0 kol ïa ka Mumbay FC, ha kaba u Everbrightson Sana u la thep ar kol, ryngkat u Abhay Gurung, Tremiki Lamurong bad u Figo Syndai.
Hadien kane ka kynhun ka la jop sa ïa ka Nongkseh SS&CC da 2-0 kol bad ha ka jingïalehkai kaba khatduh ka la ïakhaid mar 3-3 kol pyrshah ïa ka Langsning FC.
Haba phai sha ka NorthEast United ka la jop ïa ka Bodoland FC haduh 6-0 kol ha kaba u Ajaraie u la khur ïa ka hat-trick bad ïa kiwei la bynrap da u Lalrinzuala, Redeem Tlang bad u Antonio. Kane ka kynhun ka la jop sa ïa ka Karbi Anglong Morning Star da 4-1 kol hashwa ba kan pynliem sa ïa ka FC 1 da 3-1 kol.
Watla ka NorthEast United ka dei ka kynhun kaba khlaiñ bor ha kane ka lympung, hynrei ka Shillong Lajong ka donkam ban ïalehkai bha khnang ban ym ailad ban shah rem ha la ïing hakhmat katei ka kynhun ka liang pyrshah.
Kane ka jingïakhun kan sdang ha ka por 7 baje janmiet bad la khmih lynti ïa ka jingwan ai jingkyrshan na ki paidbah nongkyrshan ïa kine ki kynhun.
