Shillong, Nailar 16
Hadien ka jingsangeh kumba katto katne por, ka lympung ïalehkai Shillong Premier League 2026 kan bteng biang naduh ka sngi Ba-ar ha kaba ka Meghalaya Police kan ïakhun pyrshah ïa ka lahduh jong ka aïom ba la lah, ka Langsning FC ha ka por 4 baje nohphai sngi ha SSA Stadium, Polo.
Ha ka wat kaba nyngkong, ka Langsning ka la jop da 1-0 kol ïa ka Sawmer, katba ka MLP ka al ïakhaid mar 1-1 kol pyrshah ïa ka Rangdajied United.
Ïa kane ka lympung la lah ban pynlong hynñiew tylli ki jingïalehkai mynta ka aïom hashwa ban sangeh shipor na ka daw ba ki don ki klob kiba ïalehkai ha ka Durand Cup kiba la pynlong ha kane ka nongbah, kiba kynthup ïa ka Shillong Lajong, Langsning bad ka Nongkseh.
Kumba ka long mynta ka Langsning bad ka Nongkseh kim shym la lah ban jam sha ka quarter final ha ka Durand Cup, katba ka Lajong ka dangïai sah ha kane ka lympng, hynrei ka don la ka jong ka kynhun ïalehkai ha ka SPL.
Kiba bun na ki jingïaleh -kai jong ka SPL yn pynlong noh ha ka por 4 baje nohphai sngi, watla ki don kato katne kiba danghap ban pynïalehkai ha ka por janmiet ynda la kem dum.
Kane ka lympung kan kut ha ka 10 tarik u Risaw. Ki hynriew tylli ki kynhun ki ban wan ha ki kyrdan ba kham shakhmat kin ïoh rung sha ka SSA Super Cup, katba ka lahduh bad kaba wan ba-ar ha ka SPL kin ïoh rung sha ka SSA Champions Cup.
