Shillong, Nailar 16
Ka India kan pdiang ïa ka Afghanistan na ka bynta ki lai tylli ki jingïalehkai T20 International ki ban long naduh 13 haduh 17 tarik u Nailur ha Arun Jaitley Cricket Stadium.
Ïa kane la pynbna da ka Board of Control for Cricket in India (BCCI) hadien ba kane ka synjuk ka la ïamynjur lang bad ka Afghanistan Cricket Board (ACB). Kane ka jingïalehkai ka dei shi bynta jong ka Future Tours Program jong ka Afghanistan ha kaba kan ïalehkai ha India.
U President ka BCCI u Mithun Manhas u la ong ba ka BCCI ka dangïai bteng ban kyrshan ha ka ban kyntiew ïa ka jingïalehkai kriket ha Afghanistan bad ban ailad ïa ki nongïalehkai jong ka ban ïakhun ha ka kyrdan kaba ha khlieh duh.
Katba u Secretary ka BCCI, u Devajit Saikia u la ong, ka BCCI ka sngewkmen ban kyrshan ïa ka Afghanistan Cricket Board ban pynlong ïa kane ka T20 International Series ha India.
Ka Afghanistan dangshen ka la wan sha India na ka bynta ki lai tylli ki jingïalehkai ODI ha u Jylliew mynta u snem, katba kine ki arliang mamla ki la ïalehkai ruh ïa ki lai tylli ki jingïalehkai T20 International Series ha u Kyllalyngkot 2024. Shuh shuh ka India ka la pynlong ïa ka jingïalehkai Test kaba nyngkong bad ka Afghanistan ha u 2018, bad kine ki kynhun ki la ïai bteng ban ïashim bynta man ka por.
