Mawkyrwat, Nailar 17
Ka seng Kyntiew La I Sap Multipurpose Organisation ha ryngkat ka District Sports Promotion Society, ka la pynhap pyrda noh ïa ka lympung ïalehkai 5th Indepen -dence Cup Women Knock-out Football Tournament 2026 ha ka 15 tarik mynta u bnai ha madan MDSA Stadium, Nonglang, South West Khasi Hills District.
Ïa kane ka lympung la sdang naduh ka 15 tarik u Jylliew ha kaba ki don kumba 12 tylli ki kynhun kiba wan ïashim bynta. Ka jingpynlong ïa kane ka lympung ka long kum shi bynta ban kyntiew ïa ki ‘thei ïalehkai ha kane ka jingïalehkai phutbol.
Ki kynhun kiba la ïakynduh ha katei ka jingïakhun final ka long hapdeng ka Jakrem SC pyrshah ïa ka Pynnoh Riwar Academy, hynrei ka Jakrem ka la long kaba kham khlaiñ bor ha kaba ka la lah ban pynliem da 6-0 kol.
Ïa ka nam Best Player la ïoh da ka Ïarap Nongrum, Best Goalkeeper ka leit sha ka Banri Kordor Wahlang bad ïa ka nam Top Scorer la ïoh da ka I. Wahlang.
Ïa kane ka lympung la wan pynhap pyrda da u Bah Commander Shang-pliang, President ka HFU bad President ka Meghalaya Film Makers & Association kum u kongsan ha ryngkat ka jingdonlang u Bah Lying Lyngdoh, Vice President ka MDSA, ki dkhot ka KLISMO bad kiwei.
