Shillong, Nailar 17
Ka NorthEast United FC ka la lah ban thikna ban jam biang sha ka semi final ha ka 135th Durand Cup, hadien ba ka la pynliem noh ïa ka Shillong Lajong da 5-2 kol ha ka lah sngi U Blei ha JN Stadium, Polo.
Kane ka nam jop ka la wan urlong lyngba ka hat-trick ba la khur da u Alaaeddine Ajaraie na ka bynta ban pynlong biang ïa ka NEUFC ba kan don jingkyrmen ba kan hap biang sa shisien ïa ka nam lahduh ha kane ka lympung.
Ha kane ka jingïakhun quarter final ka NorthEast United ka la pynkhih jar nyngkong eh lyngba u Ajaraie ha ka minit kaba 11. Hynrei ka Lajong ka lah ban pynphai kylla ar kol lyngba u Figo Syndai (20) bad u Jota (34) na ka bynta ban tam da 2-1 kol ha ka kylla step.
Hadien ba la bteng ïa ka jingïakhun jong ka kylla miet, ka NorthEast United ka la ïakhun tyngeh ha kaba ka la ïoh ban thep ïa ka kol kaba ar lyngba u Ethyan Gonzalez (55) na ka bynta ban ïakhaid mar ar kol.
U Ajaraie u la thep biang sa ar kol ha ka minit kaba 58 & 69 na ka bynta ban khur syndon ïa ka hat-trick. Watla ki rangïaleh-kai ka Lajong ki la pyrshah ban pynphai, hynrei kim shym la lah ban pynurlong bad hadien katto katne por ka la shah thep biang sa shi kol lyngba u Jithin Madathil Subran ha ka minit kaba 79.
Haba phai sha kawei pat ka jingïakhun quarter final kaba la long kham hashwa, ka Mohun Bagan ka la pynliem noh ïa ka Jamshedpur lyngba ka tie-breaker da 9-8 kol bad ka la jam sha ka semi final.
Ha kane ka jingïakhun kaba la long ha Salt Lake Stadium ha Kolkata, kine ki kynhun ki la kut ha ka jingïakhaid mar 1-1 kol haduh kaba kut ki 90 minit. Ha ka minit kaba 2 jong ka kylla step u Sahal Abdul Samad u la pynkhih jar na ka bynta ka Mohun Bagan, hynrei u Devendra Murgaonkar u la lah ban pynïakhaid kylla na ka bynta ka Jamshedpur ha ka minit kaba 45. Kane ka long ka kol kaba nyngkong ba ka Mohun Bagan kan shah thep kol ha ka Durand Cup 2026.
Te kumta ka Mohun Bagan kan ïakynduh pyrshah ïa ka NorthEast United ha ka semi final ka ban long ha ka 20 tarik mynta u bnai ha kane ka nongbah, katba ka SC Delhi pyrshah ïa ka East Bengal ha ka 19 tarik na ka bynta ban ïaknieh rung final.
