Khliehriat, Nailar 17
Ka lympung ïalehkai 3rd Division Football Tournament ba la pynïaid da ka East Jaiñtia Hills District Football Association ka la nangjam shaphrang ha kaba ka Moopala SCSC ka la khur jingjop ha ka lah sngi U Blei.
Ha kane ka jingïakhun kaba la long ha madan artificial turf Diengshynrum kaba ha Khliehriat, ka Moopala SCSC ka la pynliem noh ïa ka Iongkaluh SCSC da 2-1 kol.
Kane ka jingjop kaba la wan urlong lyngba ki kol ba la thep da u Enguh Syrti (6) bad u January Pajuh (51), hynrei ka Iongkaluh ka la pynphai kylla shi kol lyngba u Starwil Rymbai (19).
Ha kiwei pat ki jingïakhun kiba la long kham hashwa hapdeng ka Shymplong SCSC bad ka Umlawang SC ki la ïakhiad mar 1-1 kol. Ka Umlawang ka la pynkhih jar nyngkong eh lyngba u Bashan Sympli (51), hynrei ka Shymplong ka la pynphai kylla lyngba u Dawyoowanphai Bhoi (64).
Haba phai sha kawei pat ka jingïalehkai hapdeng ka Umkiang Maya Club bad ka Lumputhoi SCSC ki la ïakhaid mar 1-1 kol. Ka Umkiang Maya Club la thep nyngkong lyngba u Cherister Sumer (45), hynrei ka Lumputhoi ka la pynphai kylla lyngba u Rishan Lyngdoh (75).
