Imphal, Nailar:
U Myntri Rangbah ka jylla Manipur, u Yumnam Khemchand Singh, ha ka sngi Saitjaiñ, u la pynrem jur ïa ka jinghiar thma jong ki lehnoh ha ka 14 tarik, Nailar, ha ka shnong Langka Naga kaba don ha Kangpokpi distriki, ha kaba arngut ki riew paidbah Naga ki la ïap bad arngut kiwei pat ki la mynsaw.
Kitei ki arngut ki dei kiba la tip kyrteng kum u Wiriliangbou Chawang ba 34 snem ka rta bad ka Kawidinang Abonmai ba 55 snem ka rta. Haba kren ha ka jingrakhe sngi laitluid kaba 80 snem ha Imphal, u Khemchand u la batai ïa kane ka jingshah thombor kum ka jingpynthut kaba khraw ïa ki jingpyrshang ban pynïoh biang ïa ka jingsuk bad kyntu ïa ki jaitbynriew ha kylleng ka Manipur ban kyntait ïa ki kam thombor bad ka jingïapait iapra.
U Myntri Rangbah u la ong ba ïa ka jingsuk kaba neh ym lah ban pynlong tang da ka bor bad u la ban jur ïa ka jingdonkam ban tei pat ïa ka jingshaniah hapdeng ki jaitbynriew.
U la ong ba ka jingbishar hok ha ka imlang sahlang, ka jingburom ïa ka burom jong uwei pa uwei bad ka jingïashim bynta na baroh ki bynta jong ka imlang sahlang kan long kaba donkam bha ban ioh ïa ka jingshong suk shongsaiñ kaba neh ha ka jylla.
U Khemchand u la ai khublei ruh ïa ka jingkyrshan jong ka sorkar Pdeng ha kaba weng ïa ki jingeh ha ka liang ka jingïada bad ka roi ka par jong ka Manipur. U la kyrpad ïa ki nongshong shnong ban ïatreilang na ka bynta ka jingpynïasuk bad ka jingïashong suk shongsaiñ.
Haba pynpaw ïa ki sienjam ba la shim ban pynkhlaiñ ïa ka jingpynjari aiñ bad ka jingshngaiñ jong ki paidbah, u Myntri Rangbah u la ong ba la aiti 477 tylli ki kali ba dang shu thied thymmai sha ka tnad pulit jong ka Manipur ban pynbha ïa ka jingtreikam jong ka.
U la plie paidbah ruh ïa ka Emergency Response Support System (ERSS)-112 ha kylleng ka jylla, kaba ai ïa ka rynsan kaba ïatylli na ka bynta ki nongshong shnong kiba wad jingïarap kyrkieh.
U Myntri Rangbah ka jylla u la plie ïa ka Manipur Police Museum, ka ban buh jingthoh ïa ka histori bad ka jingshakri jong ki pulit ka jylla. U la pynbna ruh ban thaw ïa ka Ïingkashari ba kyrpang jong ka NIA ha ka distrik Thoubal bad ban plie ïa ka Nodera Emergency Response Application ha Noney ban pynbha ïa ka localized Emergency Reporting.
Haba pyrkhat ïa ka sngi laitluid kaba 80 jong ka ri India, u Khemchand u la ai burom ïa ki nongïaleh laitluid bad ki riew pawkhmat ha ka histori kiba ka jingaiti jong ki ka la ïarap ban ïoh ïa ka jinglaitluid jong ka ri.
U la pynïadei ïa ki thong jong ka roi ka par jong ka Manipur bad ka mat jong ka jingroi jong ka ri kaba kham jylliew, da kaba pynpaw ïa ka jingkiew ha ki jingtei, ka jingshna tiar hapoh ka ri bad ka jingpynmih jingmut thymmai.
Ha ka jingkren pynkut jong u, u Myntri Rangbah ka Jylla u la ong ba ki jingthmu kum ka Aatmanirbhar Bharat bad ka Digital India ki la ïarap ban ai kam ïoh jam, ban pyniar ïa ki kam shna tiar trai ri bad ban pynbha ïa ka lad ban ïoh ïa ki jingshakri paidbah bad ki Digital Financial Systems.
