Jowai, Nailar 17
Ka Thadlaskeiñ Sports Association (TSA) ka la sdang ïa ka lympung ïalehkai Second Division Football League na ka bynta ka (L) Joybell Suiam Memorial, ha ka lah sngi U Blei ha madan Multi Sports Complex, Wahïajer.
Ha ka jingïalehkai kaba nyngkong hapdeng ka Lad Mukhla bad Rising SC Kdiap ki la ïasam mar shi poiñ hadien ba ki la ïakhaid mar 1-1 kol.
Na ka liang ka Lad Mukhla ka la pynkhih jar nyngkong eh lyngba u Study Shylla ha ka minit kaba 19, hynrei hadien shiteng kynta ka Rising SC Kdiap ka la pynphai kylla lyngba u Riskiel Dkhar (32).
Ha ka jingïalehkai kaba bud, ka Mukhla Wahchnong ka la pynliem noh ïa ka Tyllilang Moobakhon da 1-0 kol bad kane ka la wan lyngba u Onfiveroy Nongrum ha ka minit kaba 20.
Ha ka sngi Ba-ar ka jingïalehkai kan long hapdeng ka Mainroad SC Nartiang pyrshah ïa ka Nongthymme Nongdhar ha ka por 10 baje mynstep, kumjuh ka Thadmynri SC ïa ka Shillong Police ha ka por 12 baje mynsngi bad ka Unity SC Phlongingkhaw ïa ka United FC ha ka por 2 baje nohphai sngi.
