Shillong, Nailar 18
Ka Smit SC ka la pynliem noh ïa ka Umphrup SC da 3-0 kol na ka bynta ban khur jingjop ha ka lympung ïalehkai 2nd Division Football League 2026 ha ka sngi Ba-ar.
Ha kane ka jingïa-khun kaba la long ha SSA Stadium Polo, ka Smit ka la lah ban ïalehkai bha naduh kaba sdang ha kaba ka la ïoh ban pynkhih jar nyngkong eh lyngba u Damewanshan Nengnong- (40). Ïa kiwei pat ka la thep ha ka kylla miet lyngba u Nathaniel Kharbangar (59) bad u Batskhemlang Thangkhiew (89) na ka bynta ban khur syndon ïa ka jingjop.
Haba phai sha kawei pat ka jingïakhun ha madan MFA hapdeng ka Nongmensong SC bad ka Mawryngkneng SC ki la kut ha ka jingïakhaid hadien ba kim shym la lah ban thep kol haduh kaba kut ka jingïalehkai.
