Shillong, Nailar 18
Ka lympung ïalehkai Shillong Premier League 2026 ka la bteng biang ha ka sngi Ba-ar ha kaba ka Meghalaya Police FT ka la pynliem noh ïa ka Langsning FC da 2-1 kol ha SSA Stadium, Polo.
Ïa kine ki ar tylli ki kol la thep da u Rapborlang Marwein (44′) bad u Aldrin Ramsiej (89′), hynrei ka Langsning FC ka la pynphai shi kol da u Rohan Manar (90’+3).
Ha kane ka jingïakhun baroh ar kynhun ki la wanrah ïa la ki jong ki jingkylla ha ka thup ïalehkai jong ki, ha kaba na ka liang ka MLP, u Niawkorlang Kyndiah bad Balmingstar Lyngkhoi ki la ïoh ban mih madan ha ka jaka u Pynshailang L. Lyngkhoi bad u Bisharlang Kharumnuid.
Katba na ka liang ka Langsning ki jingkylla ha ka thup ïalehkai naba sdang ka long ba u Nister Roy Suting, Richie Kharbani, Chusrang Sangma bad Samuel Phawa ki la ïoh ban mih madan ha ka jaka u Rajat Paul Lyngdoh, Wallambok Dkhar, Rohan bad Dibormi Kassar.
Kumban shu pynkynmaw ba ka kynhun ïalehkai ka Langsning FC ka wan sha kane ka jingïakhun hadien ba ka la dep ba kan aireng ha ka lympung ïalehkai jong ka Durand Cup 2026.
Pynban ka sur ïalehkai jong ka, kam shym la long kumba la ap khmih lynti u paidbah nongwan peitkai, ha kaba ka kylla step la shem ba ka la ïoh tang artylli ki kabu ksiar kiba kam shym la lah ban pynurlong. Kawei ha ka minit kaba 32 lyngba u Richie Kharpran bad une u juh pat u rangïalehkai u la ïoh biang ïa ka kabu kaba paka bha, hynrei la lah kyrda noh pat ïa ka da u rangap kol ka MLP u Eveningstar Bareh.
Haba phai pat sha ka rukom ïalehkai jong ka MLP, ki 45 minit ba la ïakhun nyngkong, ki sei madan ïa ka sur ïalehkai ban ñion shakhmat, kaba hangne ka free-kick lyngba u Rapborlang ka la suh beit sha lyndet ka kol ka Langsning, kaba hangne u Nister um shym la ïohi bha shuh shano kane ka bol ka don namar ka jingkah ki paralok ba ïalehkai lang, kiba pyrshang ban ïada ïa ka, ïa kaba kim shim la lah satia bad jlang ban khih hi ir ka jar.
Ban jin da la dei ha kiwei pat ki sngi, lehse ka kynhun ïalehkai ka MLP FT hadien ba ka la tam shakhmat da shi kol kan jin da la ïaleh ban kham tan suki noh ïa ka rukom ïalehkai jong ka, da kaba kan shu ïakhun katba lah ban ïeng ïada da ka jingtam jong ka da shi kol, hynrei haba wan ban bteng pat sa ïa ka kylla miet ka la bteng ban ñion naphang.
Ka Langsning FC ka la shaniah tylli bha ha u Syed Ahmed uba la lah ban thep saw kol ha ka Durand Cup, hynrei mynta ka sngi, la shah tehlakam bha, ha kaba ka kabu ksiar kaba la mih paw na u ka dei tang kawei ka bol kaba u la ïoh ba un pyndei da ka khlieh ïa kaba la lah ban kyrda noh da u Eveningstar.
Shuh shuh ki la don ruh ki jingpynleh nohei ïa kiba ba bun ki kabu ksiar kiba baroh ar kynhun ki la ïoh, kaba lehse kane ka la kham ktah jur bha ïa ka kynhun ialehkai ka Langsning FC kaba kum ka lahduh jong kane ka lympung kan babe ba kam shym la lah ban pynurlong pat ïa ka sha ki kol, hynrei na ka liang ka MLP wat la ka pynlehnohei, hynrei ka jingjop ba ka la ïoh ba kan khur, kan dei ka sngi jong ka jingkmen bad ka ban nangai mynsiem shuh shuh ïa ka na ka bynta ki jingïakhun ki ban dang wan nangne shakhmat.
Kane ka lympung kumban shu ïa tip lang da baroh ka dei beit tang shi kylla (single leg) kaba ka Langsning FC da kane ka nam kaba mynta ka sngi, nangne hi shakhmat kan hap ban ïaleh tyngeh ha ka rukom ialehkai, lada ka thrang ba kan lah ban bat biang ïa ka nam lahduh da ha kane ka aïom.
Da kane jingjop, ka MLP ka la kamai 4 poiñ, katba ka Langsning FC ka dangïoh tang 3 poiñ.
Ha ka sngi Balang ka jingïalehkai kan long hapdeng ka Nangkiew Irat pyrshah ïa ka Nongkseh SSCC ha ka por 4 baje nohphai sngi.
