Guwahati, Nailar:
Ka Assam Pradesh Congress Committee (APCC) hapoh ka jingïalam jong u president ka jylla Congress u Gaurav Gogoi, ka la pynlong ïa ka jingïakhih ha Kohora ha ka 17 tarik Nailar ban pyrshah ïa ka jingthmu jong ka sorkar Assam ban pynduna ïa ka Eco-Sensitive Zone (ESZ) sawdong ka Kaziranga National Park na ka 10 Km sha ka 1 Km.
Katto katne ngut ki heh nongïalam jong ka Congress ki la ïashim bynta ha katei ka jingïakhih bad ki la pyrshah ïa ka jingthmu ban pynduna, da kaba kynthoh ba kano kano ka jingpynhiar ïa ki jingïada ïa ka mariang kiba la don lypa ka lah ban ktah ïa ka jingsumar ïa ki mrad khlaw bad ka jingshngaiñ jong ka mariang jong ka Kaziranga bad ki jaka ba marjan jong ka.
U Gogoi, ha katei ka jingïakhih, u la ïadon ryngkat bad ki nongïalam ka seng Congress, ka Meera Borthakur, ka MLA barim ka Durlav Chamua, ka Shivamoni Bora, ka Pranati Phukan bad ka Satyabrata Kalita, nalor kiwei kiwei.
Ka Congress ka la kyntu ïa ka sorkar Assam ba ka dei ban weng noh ïa kane ka jingthmu bad ban bat ïa ki lad jingïada kiba biang ïa ka mariang ha kylleng ki jaka jong ka UNESCO World Heritage Site.
Ha ka jingthoh ha ka Social Media, ka seng ka la batai ïa ka Kaziranga kum kawei na ki spah mariang ba kordor tam jong ka Assam bad ka la ong ba dei ban buh hakhmat eh ïa ka jingpynneh pynsah ban ïa ki jingmyntoi ha ki kam khaïi.
“Sangeh noh ban die ïa ka Kaziranga sha ki paralok ba trei kam jong phi”, la ong ka Congress ha ka post haba kynthoh ïa ka jingthmu ban pynduna ïa ka ESZ.
Kane ka jingïakhih ka wan hapdeng ka jingjur ka jingpyrshah jong ka saiñ pyrthei ïa ka jingthmu ban pynkylla ïa ka jaka ba la ïada ha kylleng ka Kaziranga. Ka APCC ka la pynskhem ba kano kano ka rai kaba ïadei bad ka ESZ ka dei ban shim khia ïa ka jingmyntoi kaba jrong jong ka jingsumar ïa ki mrad ki mreng bad ka mariang.
Ka Congress ka la khot ïa ka sorkar jylla ban pyrkhat biang ïa katei ka jingtyrwa bad ban pynthikna ba ka jingïada ïa ka mariang kan dang long kaba kongsan ha ki rai kiba ïadei bad ka Kaziranga bad ki jaka ba marjan jong ka.ïalam u Gogoi ïa ka jingïakhih ka seng Congress pyrshah ïa ka ESZ
